雅虎香港新聞 【電影LOL】2020香港電影票房急跌7成 《乜代宗師》《天能》成年度中西片票房冠軍
2020年終於過去，呢個「好行夾唔送」嘅年份，因為疫情關係，電影界大受影響。戲院因應防疫措施關門，連帶拖累電影映期一改再改，唔少大片搬到串流平台，觀影體驗可能由此改寫。
香港影業協會公布2020年本地電影票房數字，全年總票房收入由2019年嘅19.2億急挫至5.3億，大跌7成2。舊年全年戲院3度停業合共116日，加上配合措施削減入座率，都令戲院同片商大受影響。
至於全年票房十大，香港電影冠軍係去年賀歲檔、黃子華主演嘅《乜代宗師》，總收以2千9百幾萬。《乜》上映嗰陣雖然只係疫情初期，但係已經出現零星個案，削弱觀眾入場意慾。對比前一年子華神嘅賀歲片《楝篤特工》狂收4千4百幾萬，疫情影響威力可見一斑。
今年年中疫情一度受控，戲院開放時間比較多，造就有口碑嘅《幻愛》成為全年亞軍，總收1千5百幾萬。對小本經營嘅電影嚟講，成績令人欣喜，如果冇疫情搞住晒，收2千萬絕對冇難度。
另一套賀歲片《家有囍事 2020》埋單收近1200萬，排第三；幾套喺金像獎有獎或者提名嘅電影都打入十大，《麥路人》收827萬排第4，《金都》收526萬排第8，太保榮登香港金像影帝之作《叔．叔》收近360萬排第九。
外語片方面，導演堅持要上戲院嘅《TENET天能》，喺9月攝到個好期可以上畫，總收近5500萬，成為全年第一。對比起前年《復仇者聯盟4︰終局之戰》嘅2億2千幾萬票房，當然失色不少，但總算「執身彩」。破咗日本電影史上最高票房嘅《鬼滅之刃 劇場版 無限列車篇》，喺香港成績不俗，總收2858萬，排全年第二。第三第四位都係韓片，《白頭山： 火山浩劫》收1863萬，《屍殺列車》續集《屍殺半島》收1649萬。
展望今年，全個電影行業都要睇疫情做人，雖則有疫苗面世，但都唔代表立即見效。更需要打針嘅可能係電影業界，因為照現時疫情走勢，全年票房旺季嘅賀歲檔，好大機會戲院都係開唔到！唯有寄望今年感染數字回軟，大片排隊上場，觀眾繼續入場帶旺個市！
更多電影文章
【電影LOL】Netflix正嘢History of Swear Words 眾星名正言順爆粗
【電影LOL】《神奇女俠2：1984》逆市高收 《神奇女俠》鐵定拍第3集
