雅虎香港新聞 電影LOL︳狄卡比奧再衝影帝 演邪教教主害死近千人
里安納度狄卡比奧（Leonardo DiCaprio）主演及親自監制邪教教主Jim Jones傳記片，再次挑戰影帝寶座！根據外媒Deadline透露，MGM將會同里安納度嘅製作公司Appian Way合作聯合監製，雖然里安納度未最後首肯飾演Jim Jones，不過編劇就確定以7位數字酬勞請嚟《逃出魔幻紀》、《毒魔》編劇Scott Rosenberg執筆。
真人真事被搬上銀幕，主人翁本身一定有返咁上下傳奇︰Jim Jones一生直頭離奇，根本係大惡人。Jim Jones22歲時創立人民聖殿教，最初積極社區服務，開免費食堂、托兒所、老人睇病等，照顧社會中下層，好快因為熱心助人而有大量信眾。
信眾越多，個人開始走偏鋒，脫離基督教義，開始話自己係神化身，佈道會最常上演徒手抽腫瘤、癱咗都行得返等「治病神蹟」，呃咗唔少無醫學常識嘅信徒捐獻。
有錢有人又開始染指政治，人民聖殿堂唔止一次動員信眾為選舉造勢或左右選舉結果。而沉醉權力嘅Jim毒癮問題嚴重，被害妄想症嘅佢自稱極左分子，1977年於南美洲蓋亞那建立Jonestown，以「世上樂土」號召過千核心信徒跟隨佢移居當地。
理想國度實際係高壓、反人道地獄。生活條件極差，男女小孩分開住，10幾20人住一間房，所有小朋友都要認Jim Jones做老豆，女信徒被逼做佢後宮，仲有日做11個鐘但錢全部俾哂Jim用，日日開住廣播散播假消息洗腦，令一眾信徒唔敢走！
後來美國政府介入，派眾議員Leo Ryan及記者到當地視察，探訪期間收到部份信眾求救字條，為咗防止事件曝光，Jim派槍手殺害叛徒，結果做成包括Ryan在內共5名人士喪生。
Jim Jones有感難逃法網，召集信徒集體自殺，唔服從飲毒藥嘅信徒被即時處決。已經係邪教魔頭嘅Jim錄下整個過程，錄音帶充斥淒厲叫聲，事件最後做成900多人喪生，其中300名為小童，係近代其中一宗最恐佈嘅大屠殺。
「人民聖殿堂」事件警掦世人宗教可以安慰心靈，過份狂熱亦可以毀掉生命。電影未知會以咩角度叙述邪教教主，不過可以肯定里安納度狄卡比奧絕對勝任飾演道德崩壞同時又充滿魅力嘅狂人角色。
更多電影文章
電影LOL︳今期睇咩戲 梅艷芳／長津湖／東京貴族女子／藍色恐懼
電影LOL︳觀眾陰影太大？ One Piece拍真人版 造型照曝光已經有負評
電影LOL︳BL劇《只因我們天生一對》電影版 12月香港上映
電影LOL︳神奇女俠Gal Gadot演《白雪公主》魔后 網友大呼選角錯晒！
電影LOL︳新一代邦女郎安娜迪艾瑪絲變影壇搶手貨 傳接拍殺神John Wick外傳
電影LOL︳迪士尼拍《波西傑克森》美劇 原作者親自執筆費事電影版又爛尾
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
