雅虎香港新聞 電影LOL︳環球打低迪士尼成2023年最高票房片商狂吸49億美元 贏在冇拍超級英雄片？
金球獎星期日舉行，為影壇「頒獎季」打開序幕。電影藝術成就有獎項肯定，但電影同樣係一門生意，睇數都好緊要。
外媒Variety報導，2023年全球最高票房片商係……Universal環球影業！恭喜晒！（叱咤主持聲）環球影業，上榜作品24套，包括冠軍大片《人工殺姬》、《超級瑪利歐兄弟大電影》以及《奧本海默》，合共票房49億美元（下同）！單係《瑪利歐》同《奧本海默》已經係全球年度亞軍及季軍，分別收13億同9.5億。睇返片單，環球係大片商當中冇超級英雄片喺手嘅一間，呢一兩年superhero電影就快票房靈藥由變票房毒藥，環球可以話係逃過一劫。
賺錢之餘，攞彩都緊要。呢次環球打低蟬聯全球最高票房片商寶座8年嘅迪士尼。屈居亞軍嘅「迪記」，去年上咗17套戲，最好數係收8.45億嘅《銀河守護隊3》，其餘大片有《奪寶奇兵之命運輪盤》、《小魚仙》等。唔知係咪唔忿氣，Variety話迪士尼出咗份稿俾傳媒，強調佢地比環球出少7套戲，而且今年十大票房電影之中，迪記佔最多出品，明嘅。不過今年迪士尼罕有地冇作品成為年度全球票房三甲，而且唔計疫情2年，迪記10年來首次冇一套戲拎到10億票房。
早排我地介紹過2023年14套2億美元以上鉅片之中，得一套有望有錢賺，就係迪士尼嘅《銀河守護隊3》。雖然係咁，但迪記另外有6套2億美元鉅製，票房都係麻麻，回本已經要偷笑。環球都有套鉅片仆仆地，就係《狂野時速10》，不過假假地都收到7億呢。
去年票房冠軍大片Barbie嘅出品商華納，票房榜上排名第三，票房收入逾38億，當中Barbie已經佔3分1以上（14億元）。而Sony同派拉蒙就未報數，但都聲稱有20億元，順利成為五強。
更多電影文章
電影LOL 今期睇咩戲︳金手指／劇場版 城市獵人 天使之淚／無邪之境
電影LOL︳內地愛情片《一閃一閃亮星星》搞戲院飄雪效果出事 觀眾遇「雪崩」一身泡
電影LOL︳香港戲院聖誕檔票房加埋唔夠2千萬破20年新低 賀歲檔靠鏡仔救市？
電影LOL︳荷里活聖誕檔票房甩轆 《水行俠與失落王國》靠中國內地票房保住DC招牌
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
