鴻記海味│90後棄做公務員!回巢助老牌海味店變身做網購

鴻記海味│90後棄做公務員!回巢助老牌海味店變身做網購
90後的鄧傑彬,雄心壯志,點子多多,誓要帶領老店開出一條康莊大道。

90後。即1990年後出生的一代。年少精進,壯志雄心,有無盡計畫要進行。老字號。經營幾十年的店舖。規行矩步,擇善固執,有麝自然香,唔使搞咁多嘢。兩者合而為一,會是並行不悖,還是火星撞地球?油麻地一家老字號街坊海味雜貨店,最近有一位90後少東回巢。搞網購,做禮盒,還要推出吉祥物。老店要變身,成功失敗,還看下文分解。

【立即讚好】全新 Yahoo Food Facebook 專頁

應有盡有 老字號海味雜貨

午後的油麻地新填地街露天街市,人流不多,幾個主婦師奶工人姐姐,拉着買餸車往來穿梭,尋找今晚飯桌上的目標。匆匆的腳步,去到一所店舖前,總不免停下來。店子老舊雜亂,長長窄窄,幽幽深深,霍霍吊扇,訴說它的年資。盞盞吊燈,映照着兩旁貨物。貨物分兩邊,一邊臘味,一邊是海味,款式品種,成百上千。臘味部,掛滿各式臘腸膶腸,鵝肝腸、鴨膶腸、玫瑰腸、三花膶、特瘦……連厚街臘腸都有。旁邊牆壁,又掛滿一隻隻南安臘鴨,在燈光下,油光潤亮,臘香四散,吸引着不少上了年紀的老饕。還有金銀膶、臘鴨腸、臘鴨頭頸等,靜靜待在一旁,等待識貨之人。

鴻記海味│90後棄做公務員!回巢助老牌海味店變身做網購
鄧太事事親力親為,一邊看店,一邊又拿刀切火腿。

對面海味部,陣容也不輸蝕。開門七件事,陳列架上。貴價的海味,放在玻璃罌內,招引着路人。蝦米、蝦乾、淮山、杞子、茨實……家庭所需都有齊。還有貴價瑤柱,由$600斤日本產的,到$300斤大連產都有,豐儉由人。老人家最愛的鹹魚,當然在陣中。馬友鹹魚,梅香的,原條買有,也有切好一片片的,用保鮮紙包好,明碼實價,方便街坊買回家蒸。

鴻記海味│90後棄做公務員!回巢助老牌海味店變身做網購
臘腸膶腸,一字排開,種類達十多款,讓人花多眼亂。

「買啦買啦!鹹魚可以散買。啲南安鴨幾靚,今晚翻風蒸臘味就最啱。」一個頭戴太陽帽穿着圍裙的阿姐在店裡喊叫出來說。她是鴻記海味老闆娘鄧太,勤奮主動,和街坊打成一片。她不是在招徠,就是在搬搬切切,手上的刀,由我到店至今一直未停過。「我將啲金華火腿切開一塊塊,分成大中小,方便人買,仲有火腿碎,普通屋企煲湯買呢啲咪實惠囉。」她邊切邊說。

年輕有為 新一代回巢發展

這老舊的海味店,並非傳承的家業。是她在2010年和丈夫二人合力頂手回來的,在此之前,她只是在海味舖打工,後來原店主年邁退休,又沒有子女願意接手,她見其實店子有一定熟客,事有可為,就和丈夫商量挖了老本頂讓來做。兩公婆胼手胝足,一個顧店面,一個管貨倉,那時讀中學的兒子,放學就來幫忙送貨,一家合力扛起這門小生意。

鴻記海味│90後棄做公務員!回巢助老牌海味店變身做網購
鹹魚有原條賣,亦有切好包妥,明碼實價,方便街坊。

「送貨又熱又辛苦,推架車仔,蝦米蝦乾醬油糖鹽,送到尖沙咀都有,咁辛苦,又冇錢,嗰時唔鍾意架!」兒子鄧傑彬說。鄧傑彬,洋名Ben,31歲,穿一身恤衫西褲,橫看豎看也不似在海味雜貨舖幹活的。「四五十歲入行就好,我咁後生,唔係下嘩?畢業梗係出去睇下個世界先啦!」他說。2012年,他唸到F7輟學,果然沒有回巢做太子爺。他先去便利店做店員,別以為他去做收銀是練精學懶,他倒是懷着目的而去的。

鴻記海味│90後棄做公務員!回巢助老牌海味店變身做網購
門前高掛一隻隻臘鴨,告訴客人秋冬天要來臨。

「我畢業乜都唔識,點返嚟舖頭幫手吖!咪出去打工學營運囉。乜嘢叫做收銀機系統、零售銷售,咪靠打工學返嚟囉。仲有貨品推廣,好似佢哋朱古力賣咁平,點解?因為賣水賺番,一支水賣$10,街市賣$10六支。你話好唔好賺?

拉上補下,咪可以吸引多啲客人入嚟買嘢囉。」他一輪嘴說。便利店做了一年,學了營銷。之後又去連鎖服裝店,今次學定價。「其實服裝店季尾清貨做一折,都有30%利潤,原來佢一直mark高價位,高價賣,賺得深。清貨賣,賺得淺,但都係有得賺。」他說。

新舊並存 一家人協力同心

他潛心修練,用了七年時間出外打工,便利店、連鎖服裝店都做過,學了一身功夫。最後還做到醫管局作公務員,看看政府如何運作。外面世界很精采,本來他執意不回來,是可以穩穩陣陣,無災無難到公卿,加上又結了婚,穩定本應壓倒一切,誰料做了兩三年公務員,他竟然辭工,回到油麻地這老舊海味店。

「細個落嚟做嘢,就知道父母辛苦。心就諗住會返嚟幫手,不過唔係畢業即刻返啫,出去見過世面,學完嘢咪返囉。」Ben說。2019年尾,新冠肺炎驟起,店舖生意一落千丈,他知道是時候回巢了。「隔籬凍肉佬話,條街靜到AK47亂掃都唔會死人。我知道父母守得好辛苦,咪即刻辭工回來幫手囉。」他說。

鴻記海味│90後棄做公務員!回巢助老牌海味店變身做網購
日本元貝$600/斤,是店裡其中一款高價貨。

士別三日,他回巢,已非叫吳下阿蒙。回巢第一步,就是搞網頁,他看準疫情期間,人客不出街購物,就動手建立店舖網頁。蝦乾、蝦米、螺頭、蠔豉、無花果……全部拍照放到網頁上賣。又推出八款禮盒,由最便宜的$100花菇圓肉禮盒,到$800日本宗谷元貝禮盒都有。又在網頁放上海味知識,教人認識海味。又上載食譜,讓客人方便跟住做。「嚟緊想做湯包,同中醫合作,條方中醫提供,料由我執,上網賣,方便快捷。」他說。

鴻記海味│90後棄做公務員!回巢助老牌海味店變身做網購
店舖網頁,產品分門別類,又有各式禮盒,可以網購。

他計仔多多,回巢後生意升了約兩成,成績開始顯現。「遟啲仲會做埋吉祥物添!」他喜孜孜的說。只怕步伐行得快,上一代人能否跟得上?「係呀!佢哋舊派人,上次俾人偷嘢,我話裝個CCTV,佢哋都話唔使。我阿媽覺得生意靠人傳人,有麝自然香,唔使宣傳嘅。」他說完,又瞄一瞄正在招客的鄧太。「買啦買啦!我哋啲臘腸好靚架,今晚翻風煲臘味飯就最啱。」鄧太正鼓着如簧之舌,努力招徠每一單生意。新搞作,舊經營,看來在同一屋簷下,運作暢順,相處很好。

鴻記海味

地址:油麻地新填地街94號(地圖按此

電話:59192181

全新訂座平台「Yahoo訂餐廳×Openrice」正式上線!

>>立即按此了解更多香港各區餐廳訂座優惠<<

今晚食乜好?即睇最強雞翼食譜、牛油果食譜合集

食乜養生好?二十四節氣:中醫教路/湯水進補/穴位養生

自助餐推介!睇盡各種自助餐優惠/回本攻略

想知最新飲食資訊?按此觀看Yahoo Food編輯推介

更多油麻地美食推介

油麻地美食推薦合集2021!龍蝦湯稻庭烏冬/梳乎厘班戟/奇幻童話風森林Cafe

油麻地美食|打冷名店紅伶重開變兩層多咗嘢食 即睇打冷鑊氣小炒推介

【油麻地美食】半年零收入改賣串燒聘同業 舞台燈光師:自己行業自己救

【油麻地美食】米芝蓮推介牛腩小店! 10款自創口味牛腩:脆皮/藥膳/咖喱

【油麻地美食】22歲店主逆市創業!旺角開店賣椰子碗甜品

【油麻地美食】$188啫啫五款海鮮煲 任點任食+免費一手蜆

【油麻地美食】小巷多士店!香茅豬扒蛋吐司 丁子高都開post讚?

>>按此下載<< 全新Yahoo APP,領取最新餐廳優惠、氣炸食譜、自助餐推介、仲有飲食達人教你識煮識食,讓你成為真正全面的吃貨,立即下載!