【電影LOL】Netflix 年度大片巡禮 神奇女俠搭死侍拍動作喜劇有睇頭 眾星雲集Don’t Look Up災難變喜劇

串流平台Netflix今日哂冷推出宣傳片,公布2021年有咩新戲上場,陣容星光熠熠,戲種又多,今年片單一定勁過哂荷里活傳統片廠!事不宜遲,同大家介紹下有咩好戲睇先!

搵得「神奇女俠」Gal Gadot、「死侍」Ryan Reynolds同動作巨星The Rock Dwayne Johnson一齊開場,當然要介紹由佢哋3位主演嘅動作喜劇Red Notice,講述國際刑警緝拿藝術品大盜,過程一定錯漏百出笑料不斷!

Thunder Force(《雷霆女神》)

由《凸務Madam》、《捉鬼敢死隊》Melissa McCarthy及《NASA無名英雌》Octavia Spencer主演,由2位阿姐飾演擁有超能力嘅超級英雌。超級英雄睇得多,大媽特攻又有幾睇頭!

「水行俠」新作Army of the Dead

動作片方面分別有「水行俠」Jason Momoa主演嘅Sweet Girl以及《正義聯盟》Zack Snyder執導、《銀河守護隊》大隻佬Dave Bautista主演嘅Army of the Dead,前者誓要搵到殺妻真兇以保護女兒安全,後者救世狂打喪屍!幾位主角一向以鐵漢形象示人,加上動作連場,相信隔住個mon都聞到陣男人味湧出嚟!雷神Chris Hemsworth 亦會拍科幻片Escape from the Spiderhead,故事講監獄犯人可以參與活體實驗換取減刑,犯人服用測試藥物之後,發現自己嘅情感唔再屬於自己。

喪屍片Army of the Dead(《活屍大軍》)

鍾意恐佈片嘅觀眾,除咗喪屍片Army of the Dead(《活屍大軍》)之外,一定要留意Fear Street 3部曲。本來屬於二十世紀霍士嘅出品,早前因為迪士尼拼購霍士差啲被埋沒,好彩Netflix出手買入先有得見街!電影改編自R.L. Stine同名暢銷小說,故事圍繞小鎮不停出現離奇媒殺案。

劇情片 影后Halle Berry自導自演格鬥女選手

劇情片方面亦相當精彩,有Halle Berry自導自演過氣MMA格鬥選手,為咗兒子決定再出發,重回格鬥場奮力一戰嘅Bruised;又有《毒癮女孩》導演Sam Levinson新作Malcolm & Marie(《首映夜》),新戲繼續由《毒癮女孩》艾美獎得主「蜘蛛女」Zendaya做女主角,男主角則由《天能》John David Washington擔任,成套戲都喺同一個場景拍攝。導演話呢套唔係愛情電影,只係講述男女感情關係各自期望與落差。

喜劇Don’t Look Up 末日搞gag

成個片單最期待一定要數喜劇Don’t Look Up,電影講述隕石將於6個月內襲地球,2個太空人出力挽救嘅故事。將世界末日災難故事包裝成喜劇,再加上個豪華到嚇死人嘅主演陣容,集齊里安納度迪卡比奧(Leonardo DiCaprio)及Jennifer Lawerence、梅姨梅麗史翠普、Cate Blanchett等幾位影后,再加上「甜茶」Timothée Chalamet、樂壇小天后 Ariana Grande同美劇《老友記》嘅Matthew Perry等人主演,單係個cast都一定要睇!

更多電影文章

【電影LOL】Marvel高層大爆動向 《黑豹》唔易角 死侍正式加入Marvel宇宙

【電影LOL】等足15年 《新·福音戰士劇場版 │▌》如期上映 取消優先場嚇親fans

【電影LOL】《男兒當入樽》電影版不日登場 放心!唔係真人版!

【電影LOL】劉亞仁增肥33磅寒背扮啞仔 Voice of Silence 演低下階層幫黑幫收屍

【電影LOL】2020香港電影票房急跌7成 《乜代宗師》《天能》成年度中西片票房冠軍

【電影LOL】一文睇晒 13套改期2021年上畫大片

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!