【電影LOL】Marvel高層大爆動向 《黑豹》唔易角 死侍正式加入Marvel宇宙

眾多大片因為新冠疫情關係導致拍攝進度受阻,不過對於一早準備開啟全新一章嘅漫威(Marvel)影響不大,一系列電視劇如期喺Disney+串流平台出街。Marvel主席Kevin Feige近日為宣傳以「紅女巫」溫黛及幻視做主角嘅WandaVision接受大量傳媒專訪,大講漫威宇宙(MCU)最新動向!

首先Kevin Feige於訪問中同大家保証,漫威第4階段大藍圖無因為疫情而拖慢進度。雖然《黑寡婦》、《永恆族》嘅映期延後,但作為第4階段第1炮嘅WandaVision將於今周播映,據聞仲有一個喺《復仇者聯盟4》死咗嘅角色會翻生演出。WandaVision外,接連同第4階段有關嘅迷你劇The Falcon and the Winter Soldier、Loki、Ms. Marvel及鷹眼Hawkeye都會陸續上架。

佢都仲有講埋其他漫威電影嘅去向,好似確定開拍嘅《黑豹》續集,因為主角Chadwick Boseman因病離世,大家都好關心續集故事發展。Kevin確定唔會就T’Challa重新選角,亦唔考慮用電腦特效造個Chadwick出嚟,導演Ryan Coogler創作嘅劇本將以對Boseman才華、人品嘅尊重出發,延續佢嘅星光,佢仲提及Boseman生前幫《黑豹》動畫What if配咗3集音,唔排除會從中取材咁話。

而另一個重要消息就係確定「死侍」正式成為MCU一員!自從迪士尼買咗霍士二十世紀影業後,好多影迷都好想知霍士旗下嘅「變種特攻」、「死侍」將會何去何從。有關呢堆超級英雄「轉會」加入漫威系列傳聞以久,一直只聞樓梯響,連「死侍」漫畫作者Rob Liefeld都鬧爆Marvel唔做嘢,遲遲唔安排「死侍」前路。

日前Kevin Feige終於鬆口,確定開拍《死侍3》,依家搞緊劇本,連男主角Ryan Reynolds都會親自督導,不過佢就話Ryan「好成功所以好忙」,所以《死3》今年無辦法開拍,暫時未有映期咁話!Kevin強調《死侍3》會維持首2集風格,包保粗口及血腥場面滿天飛,肯定限制級兒童不宜!

Ryan Reynolds雖然被Kevin擺上枱暗指進度緩慢同佢有關,不過Ryan一於少理,自己喺Twitter轉發有關消息。話哂經歷過《綠燈俠》一片負評嘅演藝污點,捱咗咁耐先因為「死侍」上位,成為演藝代表作,又點會介意被老細Kevin Feige抽水!

更多電影文章

【電影LOL】等足15年 《新·福音戰士劇場版 │▌》如期上映 取消優先場嚇親fans

【電影LOL】《男兒當入樽》電影版不日登場 放心!唔係真人版!

【電影LOL】劉亞仁增肥33磅寒背扮啞仔 Voice of Silence 演低下階層幫黑幫收屍

【電影LOL】涉抄襲15年後終認衰 串嘴才子郭敬明新片《晴明集》受拖累臨時落畫

【電影LOL】2020香港電影票房急跌7成 《乜代宗師》《天能》成年度中西片票房冠軍

【電影LOL】一文睇晒 13套改期2021年上畫大片

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!