《痞子無間道》大結局｜黃子恆為救麥美恩壯烈犧牲網民動容 車婉婉爆喊戲5大情緒轉折晒好演技

《痞子無間道》昨晚（14日）一連兩小時播映大結局，最終迎來眾望所歸的大團圓，周嘉洛陳瀅、王灝兒JW朱敏瀚有情人終成眷屬，大魔頭曹永廉則惡有惡報。

黃子恆被指有機問鼎今年最佳男配角五強

不過其實昨晚的大結局，大團圓之中仍留有遺撼！就是黃子恆飾演的范泰帥，為了拯救一直深愛的思朗（麥美恩飾），竟捨身成仁連人帶炸彈衝入海中，最終於半空被炸死，死得轟烈；但值得安慰的是，泰帥不但於臨死前與思朗冰釋前嫌，還向思朗送上深情吻別，死後還恢復了捕快的身份並獲得了高榮譽葬禮。對於子恆角色壯烈犧牲，網民大感意外及動容，並留言肯定子恆演技：「今年最佳男配角最後五強應該有佢」、「佢真係做得好好」。

子恆：「我喊到要行出廠」

談到角色慘死，子恆接受TVB.COM訪問時坦言當初得悉「死訊」時，也因太投入感到不捨、一度哭成淚人，並成為同劇演員笑柄，子恆說：「當時拍攝時因為係飛紙仔嘅，大家都唔知結局係點，直到出劇本先知泰帥最尾會死。到知道有呢場戲後，有一日放飯時，我突然醒起原來嚟緊嗰場戲，就係我最後一次見到嘉洛仔同陳瀅佢哋，當我發現咗之後，我就忍唔住喊，心諗：『原來我哋冇機會再見喇』。我覺得應該係因為當時真係太投入，所以會有呢種感覺，我記得我係喊到要行出廠。之後阿瀅萬歲請食雪糕時，仲拍咗條片話要睇我喊添。」

另一焦點場口，絕對是車婉婉大晒喊功！事緣當爆出費仁（周嘉洛飾）真實身份是萬千霞（馬海倫飾）失散多年的兒子思春後，潔姨（車婉婉飾）即含著滿眶眼淚向著驚訝萬分的費仁道歉：「對唔住，我呃咗你咁多年。」之後，潔姨再以激動Tone、面紅耳赤兼淚流披面謂：「我好憎你呀！咪亂咁叫你做費仁咯！」然後滿臉憐愛地捧著費仁的臉說：「我曾經想揼低你，但我真係唔捨得呀！」說時樣子滿是掙扎及辛酸，而當最後得悉公子（朱敏瀚飾）就是自己的骨肉是，車婉婉再流露出傷心中見茫然的表情，所以情緒的轉折均恰到好處，演技實力不容忽視，網民亦大讚婉婉將潔姨角色演得相當立體！

難忘角色情緒大起大落 車婉婉開心劇中「子女成群」

談到潔姨角色成功入屋，婉婉笑言很開心收到不少正評，並感激監製賜予這麼具大挑戰性的角色給她：「因為個角色係好大twist，神經質、搞搞笑笑之餘，仲有好多感情戲，大喊大笑大開心大傷心咁，希望大家睇完《痞子》結局後，覺得搞笑之餘仲係有笑有淚。」談到喊戲場口，婉婉坦言由於事前做足功課，整理了角色頭二十多集累積的鬱結，所以拍攝時尚算順利：「雖然我個水煲易著嘅，但都要有感覺先嘅，同埋拍喊戲我通常兩、三個take內要自己完成到，因為真眼淚喊唔到太多，係會乾塘！呢場喊戲潔姨個角色因為都屈住咗好多嘢，所以感情都嚟得自然。」

車婉婉：其實做媽媽嗰樣嘢，我喺呢套劇都有投射到出嚟

婉婉續指另一難忘位，是劇中子女成群，來到最後周嘉洛、JW、朱仔及陳瀅全部都是她的兒女。問到現實中也是媽咪身份的婉婉，私下教仔方法與潔姨是否相似時，婉婉即搞笑地分享升Key教仔大法：「其實好多父母都同潔姨一樣鬧完又錫番，其實BBQ跩嗰吓，都要氹吓鬧吓，例如叫佢做功課，你都係用愛心講，但佢又未必聽、又未必肯埋位，埋咗位又未必坐得低，於是我就要好似唱歌咁升Key，一路升Key，升到一個位佢好驚慌就會喊喇。我個仔好得意嘅，佢會問：『媽媽係咪你唔愛我喇？』，我就會諗係咪個key高咗啲呢？跟住我哋會和解，我會講對唔住。其實做媽媽嗰樣嘢，我喺呢套劇都有投射到出嚟，同埋呢套劇最後全部都係我仔女，我覺得好好笑。」