雅虎香港新聞 【電影LOL】派拉蒙寫定劇本準備重拍《珠光寶氣》惹官非 隨時要賠3.9億
荷里活片廠不停重啟或重拍賺錢項目，超級英雄類型尤其嚴重。只要票房唔夠理想，又或者選角未如人意，電影公司即時啟動重拍，2016年版本《自殺特攻》成績不如人意，事隔短短5年，就轉搵《銀河守護隊》導演James Gunn用全新cast再拍一次，得Margot Robbie有得留底繼續做「小丑女」，因為佢嘅演出受好評囉！
《蜘蛛俠》又係咁，Andrew Garfield分別於2014年及2016年拍咗2套「蜘蛛俠」，結果反應麻麻，2017年片商就重啟拍咗Tom Holland版嘅《蜘蛛俠：強勢回歸》，同一個故事3年睇2個版本，完全懶理觀眾荷包！
「重啟」、「重拍」喺多個串流平台崛起後更頻繁，不過唔係套套經典都可以重拍。派拉蒙片廠打算重拍名片《珠光寶氣》（Breakfast at Tiffany’s），近日就因為咁被《珠》原著作家Truman Capote嘅法定遺產繼承人控告侵權，隨時要賠5000萬美金（約港元3億8900萬港幣）！
根據美媒The Hollywood Reporter報導，代表Truman Capote基金會嘅Alan Schwartz，因為派拉蒙內部傳閱一份《珠光寶氣》劇本，指片廠有意將經典電影重拍並售予串流平台，認為侵犯原著版權。消息令基金會籌備中嘅劇集蒙受高達2000萬美元損失，決定向片廠追討，並要求賠償5000萬美金。
1961年推出電影《珠光寶氣》由柯德莉夏萍主演，故事講述女主角Holly農村出身，努力擠身上流社會成為交際花希望釣到金龜。鄰居Paul係靠富婆養嘅窮作家，2顆同病相憐的心慢慢釀出愛情，Holly最後放棄嫁予巴西富豪，投向愛情嘅懷抱！電影中無論係柯德莉夏萍嘅衣著打扮、小黑裙、長煙、歌曲Moon River，以至柯德莉夏萍企於Tiffany’s櫥窗前食牛角包飲咖啡一幕皆成為經典，至今難忘！
《珠》雖改編自Truman Capote嘅小說，劇本由George Axelord編寫，不過電影同原著分著幾大，畢竟係出身貧寒女子為生活出賣自己嘅故事，小說比電影嘅有情人終成眷屬愛情故事陰暗得多。基金會有原著版權，而派拉蒙有電影版權，因為打緊官司，一日未有共識，雙方都要擱置任何《珠》嘅計劃。
如果《珠光寶氣》重拍，會唔會搵Emily in Paris 嘅Lily Collins做Holly? 唔好啦。
更多電影文章
【電影LOL】哥哥張國榮逝世18年 南韓戲院重映作品兼出精美週邊 香港嘉禾戲院播《色情男女》
【電影LOL】真熊真事改編 《白粉熊》拆解森林黑熊吸毒過量死之謎
【電影LOL】空肚講燒肉！土屋太鳳新片《奇蹟的燒肉店》帶你去日本食好西
【電影LOL】今個星期睇咩戲《哥斯拉大戰金剛》《約定的夢幻島》《悲傷路上還友你》《午夜諜變》《複身犯》
【電影LOL】奇洛李維斯創作漫畫BRZRKR大賣 Netflix扑鎚拍成電影搵奇哥孭飛
【電影LOL】內地翻拍《秋田犬八千》八千變八筒 網友mean問︰馮小剛演八公？
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
