葡萄友：如果你識有人唔識用八達通 一定要好好珍惜

日前一位特首候選人大玩親民騷，想扮貼地結果反而堅離地，連八達通都唔識用，畀人恥笑足幾日。咁又係嘅，人哋以前做大官，出入都有專車，邊度要用八達通吖；更何況講到「入閘」咁敏感嘅話題，真係唔收到Order唔敢入架嘛！其實一般香港市民，八達通已經必備物品，如果有人同你講話唔識用八達通，呢位朋友一定非同小可，乃人中之龍也！建議大家巴結巴結！包括咩人？咪以下呢班囉。

有錢人
非正式統計十個有錢人，十一個唔識用八達通，咪講話八達通，直情現金都無。如果你識一個朋友，佢話自己好耐無用過八達通，咁佢應該係隱世有錢人。如果佢連八達通都唔知係咩，佢直情唔係離地，可以話係離世，即係「離開我哋世界好遠」咁解。

自由神
我哋嘅大陸同胞落親香港，事必當港鐵閘機係景點一樣，駐足觀賞幾分鐘，先可以入到閘，就算有一張八達通喺身，佢哋都會嘗試塞張咭入閘機；有時閘機寫明大大個交叉指示，佢哋一樣照入不誤。大陸同胞係好多人米飯班主，財神一樣，梗係要巴結啦。

林峯
咪咁快玩失憶呀，亞太區最受歡迎男歌手林峯去年先獲得港鐵送贈一張「一世任搭票」，不過佢就即刻倒人哋米，話自己好少搭港鐵，仲爆出一句「唔知八達通可以搭港鐵」如此震驚13億人嘅說話。咁又係，人哋大明星、大財主個仔，秒秒鐘幾十萬上落，又咁多Fans，搭港鐵畀人圍住要拎簽名點算？