陳妍希陳曉23字文宣布離婚︰今後各⾃安好 拍《神雕俠侶》而結緣 盛傳離婚多時
台灣女星陳妍希同內地男演員陳曉近年屢傳離婚，但二人一直未有交代，終於今日呢對「神雕俠侶」各自喺社交專頁發文，同樣寫道「感恩遇見，今後各自安好，未來同為孩子的父母，共同陪伴孩子成長」，並標註對方的社交帳號，正式官宣離婚。
2014年陳妍希同陳曉因為拍內地劇集《神雕俠侶》而結緣，並於2016年宣布結婚及陳妍希懷孕消息，同年底陳妍希誕下兒子「小星星」。不過二人婚後多次傳出婚變，2019年首先爆出陳妍希陳曉少大鑊，陳曉甚至將兒子送回老家由父母照顧，但後來否認婚姻出問題，更加表示打算追多個。
舊年有內地狗仔爆料稱，陳曉喺2023年已經提出離婚，甚至話陳曉換電話號碼兼block埋陳妍希社交帳號，要由中間人負責雙方溝通。去年底陳妍希父親離世，有指陳曉未有參加外父喪禮，引起外界有更多揣測。早前更有網民發現過年時二人微博IP位置不同，陳曉喺家鄉安徽，陳妍希就喺北京，估計二人未有一齊過年，令離婚傳聞更加似層層。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
