SoChing大控訴 「成日迫住聽到呢個名」 疑暗示與男友李啟言Mo出事有關

MIRROR 2022年紅館演唱會發生墮屏事故，導致舞蹈員李啟言（阿Mo）等3人受傷，當中阿Mo傷勢最嚴重，事發至今2年多仍在接受治療。阿Mo嘅女友SoChing（蘇芷晴）本來係女團COLLAR成員，阿Mo出事後SoChing忙於照顧男友，加上未能完全適應幕前工作，因此於2023年5月宣布退出COLLAR。

蘇芷晴喺Mo出事後甚少就男友出事表態，但喺今日凌晨SoChing喺IG限時動態發文，寫道「真係嬲嬲地 我唔想我人生中成日要迫住聽呢個名 點解身邊咁多人要同我講呢個名？ 有無諗過聽嗰個係咩感受？ 喂？ 係咪唔記得2022年7月發生咩事？ FYI到依家件事仲未完」。

SoChing未有指明「呢個名」係講緊邊個，但網民推斷同MIRROR 紅館演唱會事故相關，矛頭直指MIRROR、MIRROR成員兼阿Mo好友盧瀚霆(Anson Lo)、SoChing原屬團體COLLAR以至MIRROR經理人公司MakerVille等。而SoChing寫明「2022年7月」嘅事﹐相信今次係佢少有地公開提及墮屏事故。

至於阿Mo嘅康復進度，Mo爸爸李盛林牧師喺最近一次嘅代禱信中提及，現階段阿Mo嘅治療以繼續配對大腦電波與小肌肉神經和筋腱的運作、進一步藉細胞復修技術增加身體不同的感覺和受創脊椎神經的復修，以及從「單組肌肉」到「組合肌肉」活動的配對和操練，藉此建立日常生活的功能活動。而李牧師都喺信中表示「再一次感謝有關公司的負責人在出事的時候公開承諾，並一直支持鼓勵阿MO的治療」。

阿Mo現時可透過手提電話中嘅語音識別系統操作手機，所以佢亦逐漸活躍社交網站，早前佢曾上載與爸爸嘅合照到IG，並寫上字句感謝家人，但由於冇提及女友SoChing令網民猜測二人關係。後來阿Mo喺上年平安夜，上載昔日與女友一齊為聖誕樹裝飾嘅短片，力證二人關係未變。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！