【電影LOL】電影評論學會大獎 《理大圍城》膺最佳電影 鞏俐奪最佳女演員

·3 分鐘文章

2020年受新冠疫情影響,戲院3度停業,嚴重打撃電影業,多部作品未能如期上映,香港電影金像獎都要停辦一年!由香港電影評論學會舉辦嘅「第27屆香港電影評論學會大獎」就不受疫情影響,如期舉辦。

要入圍評論學會大獎必需要符合4個條件:首先,導演要係香港永久居民;出品公司中至少一間為香港註冊公司;影片15個工作項目(監制、編劇、男主角、女主角、男配角、女配角、攝影、動作指導、美指、服裝造型、剪接、原創電影音樂、原創電影璞曲、音響效果及視覺效果)中至少有6個崗位由香港永久居民擔任;影片必需長過60分鐘及喺香港戲院作首輪公開售票放映,一星期內上映不少於5場。

依家合拍片當道,再加上疫情戲院停業影響,2020年要符合以上資格嘅電影唔多,總共得30套。雖然量少,不過大會唔會分豬肉頒獎,好似「最佳男演員」因為未見有表現突出者,寧願從缺都唔會亂頒!剛剛18日大會公佈今屆得獎名單如下:

最佳電影:《理大圍城》
最佳導演:陳可辛(《奪冠》)
最佳編劇:梁銘佳、Kate Reilly(《夜香.鴛鴦.深水埗》)
最佳女演員:鞏俐(《奪冠》)
最佳男演員:從缺

推薦電影五部:
《好好拍電影》
《夜香.鴛鴦.深水埗》
《3cm》
《奪冠》
《一秒拳王》

今屆「最佳電影」係紀錄片之爭,最後4強分別為香港紀錄片工作者導演嘅《理大圍城》;文念中執導、追訪許鞍華導演嘅《好好拍電影》;黃肇邦執導、講述罕見病患家庭及社會支援不足嘅《3cm》及由4個短片組成、由梁銘佳及Kate Reilly合導嘅《夜香、鴛鴦.深水埗》。

幾套候選電影都以「香港」為中心,最後《理大圍城》憑「冷靜準確捕捉抗爭現場的人、事、氣氛及出色的剪接」奪得此項大獎,繼第16屆由張經緯執導、講述黃家正音樂天才成長之路《音樂人生》後,再有紀錄片獲得此殊榮。

而陳可辛則以「香港人角度」,在「主旋律但不甘歌功頌德」等創作限制下,拍出40年中國女排興衰史,充份展現出導演功力而獲得「最佳導演獎」。而片中飾演朗平嘅鞏俐,亦憑氣場及演技將「朗平」活現銀幕,獲得「最佳女主角」獎項。

5套推薦電影中,觀眾應該對《理大圍城》及《一秒拳王》比較陌生,前者受盡香港電檢處留難,主流上映又困難重重,搞得成小型放映又因為戲院停業要改期,想睇都無辦法睇!而熱血勵志好適合當下氣氛欣賞嘅《一》原定於上年12月3日上映,撞正疫情戲院停業,暫時上映無期!

好電影唔應該無聲無色,戲院開返時,希望大家多多支持!

更多電影文章

【電影LOL】迪士尼為《花木蘭》報名爭奧斯卡15大獎 劉亦菲甄子丹角逐影后男配角

【電影LOL】Netflix大熱《柏捷頓家族:名門韻事》古裝浪漫床戲多多

【電影LOL】露骨短訊爆鍾意SM Armie Hammer驚傳性愛醜聞 辭演天后J.Lo 新片

【電影LOL】Netflix 年度大片巡禮 神奇女俠搭死侍拍動作喜劇有睇頭 眾星雲集Don’t Look Up災難變喜劇

【電影LOL】Marvel高層大爆動向 《黑豹》唔易角 死侍正式加入Marvel宇宙

【電影LOL】《男兒當入樽》電影版不日登場 放心!唔係真人版!

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!