【電影LOL】Netflix大熱《柏捷頓家族：名門韻事》古裝浪漫床戲多多

天氣轉涼，又無得約朋友出街食飯，唯有留守家中煲劇。繼《後翼棄兵》（The Queen’s Gambit)及日劇《今際之國的有栖》後，最多人講同追嘅應該係英國古裝浪漫愛情劇《柏捷頓家族：名門韻事》！

被譽為「古裝版《花邊教主》」嘅《柏》一出就成為多國Netflix最多人睇嘅劇集，故事講述成家都係俊男美女嘅柏捷頓家族，長女Daphne（Phoebe Dynevor飾）為嫁個好老公而同鑽石王老五男爵Simon上演一場大龍鳳扮互有好感，吸引城中八卦寫手Lady Whistledown注意日寫夜寫成為社會熱話，Daphne因而身價水漲船高，Simon則可以令城中虎視耽耽嘅女人知難而退，結果戲假情真。

故事設定於古代，未嫁貴族女子名聲大過天，連單獨同異性相處都唔可以，但貴族男子不受此限。戲內個個男人都好有「經驗」，嫖妓、收埋情婦、做多人運動都無問題，反而啲女子對性事無知到連點先有bb都唔知！所以純情Daphne遇上經驗豐富嘅Simon，開竅後成個人唔同哂，新婚熱戀好纏綿，喺睡房、圖書閣到後園野餐甚至室外避雨隨時上演激情戲碼！

飾演男主角Simon嘅英國演員Regé-Jean Page因此爆紅。受訓於英國國家青年劇院，有眾多舞台劇演出經驗，有演技有身材仲要飾演貴族男爵，露股大演火辣辣床戲，難怪睇到各地影迷心心眼，外地觀眾入戲到認定2位演員戲外都係一對！Regé-Jean同Phoebe都矢口否認，不過《柏》確定有第2季，再度合作未來擦出愛火絕對唔奇！

《柏》改編自Julia Quinn同名系列小說The Bridgerton，合共有9部。Netflix嘅《柏》根據小說第1部The Duke and I改編，每本小說以柏捷頓8兄弟姊妹各自做主角。第2部小說The Viscount Who Loved Me就以大哥Anthony為主角，講佢搵真愛嘅故事。至於Netflix劇集版會唔會順住拍暫時未知，如果第2季都咁受歡迎，有機會繼續開，可以肯定《柏》至少夠拍9季！

小說版嘅The Bridgerton同樣極暢銷，不過都有幾分似用粉彩畫做封面、「霸道總裁愛上我」嗰類言情小說。劇集能夠全球大熱，關鍵人物一定要數曾經炮製出《醫人當自強》及《逍遙法外》等得獎劇集嘅監制Shonda Rhimes。佢為古裝宮廷愛情戲注入新時代氣息，包括使用不同種族演員，由黑人演員飾演皇后及貴族非常少見！配樂方面全部係當時得令歌曲，好似有Billie Eilish《Bad Guy》又有Maroon 5 《Gilrs Like You》，古裝得嚟完全唔古板！

劇組為咗重現1813年嘅英國上流風貌，動用咗7500件戲服，單係女主角Daphne去親ball場都有新禮服，短短8集就換足104套戲服！靚人靚景談情說愛仲有juicy場面，最緊要滿足到大家八八卦卦講下是非嘅需要，難怪喺疫情低沉時期成為各地觀眾首選！

更多電影文章

【電影LOL】露骨短訊爆鍾意SM Armie Hammer驚傳性愛醜聞 辭演天后J.Lo 新片

【電影LOL】Netflix 年度大片巡禮 神奇女俠搭死侍拍動作喜劇有睇頭 眾星雲集Don’t Look Up災難變喜劇

【電影LOL】Marvel高層大爆動向 《黑豹》唔易角 死侍正式加入Marvel宇宙

【電影LOL】《男兒當入樽》電影版不日登場 放心！唔係真人版！

【電影LOL】劉亞仁增肥33磅寒背扮啞仔 Voice of Silence 演低下階層幫黑幫收屍

【電影LOL】2020香港電影票房急跌7成 《乜代宗師》《天能》成年度中西片票房冠軍

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！