雅虎香港新聞 電影LOL︳Disney+狂炒冷飯 Amy Adams再演天真嬌俏公主 湯漢斯演新版《木偶奇偶記》
迪士尼串流平台Disney +正式登場，相信唔少用家依家密密左㩒右㩒研究有咩啱睇，旗下迪士尼、彼思電影及漫威系列等片量豐富，未來亦會陸續擴大Disney+獨家內容。
上星期五Disney Day活動就公布最新平台片單，其中最有趣一定係《魔法奇緣》續集Disenchanted！《魔》於2007年上映，由當時仲未係奧斯卡最佳女主角入圍常客嘅Amy Adams，以及當年憑《醫人當自強》成為男神嘅Patrick Dempsey主演。故事講述童話公主Amy由動畫世界穿越去到現實世界嘅紐約，主打公主水土不服笑料，Amy以無辜天真大眼演繹咩都唔識嘅童話公主可謂一絕！
《魔》成績唔錯，不過續集一直只聞樓梯響，而Amy Adams亦轉型成演技派，經常出現於各大電影獎項影后候選名單上。估唔到事隔多年佢又肯參與愛情喜劇，同Patrick再次合作演出續集Disenchanted，電影預計2022年秋季上線。
另一套值得期待仲有真人版《木偶奇偶記》，《木》真人版電影傳過多個版本，連《忘形水》金像導演Guillermo del Toro都有打算開拍，不過迪士尼版將由《阿甘正傳》導演Robert Zemeckis執導，影帝Tom Hanks、Cynthia Erivo及《美女與野獸》男星Luke Evans主演，而《潛行凶間》男星Joseph Gordon-Levitt將會聲演，預計下年秋季有得睇。
最近忙緊拍《色慾都市》嘅Sarah Jessica Parker亦有新戲於Disney +出現，佢將會同Bette Midler及Kathy Najimy再次聚首主演《女巫也瘋狂》（Hocus Pocus）續集。首集於1993年面世，相信好多朋友都未出世，故事設於1600年代住喺偏遠小鎮嘅巫婆3姊妹，因為作惡被村民處刑，當時幾姊妹落咒會翻生，吸哂小朋友嘅靈魂！
故事聽落恐怖嘅《女》其實係合家歡喜劇，適逢電影27周年再次推出續集，唔知未聽過未睇過《女巫也瘋狂》嘅觀眾又受唔受落？
《鐵血戰士》系列新片Prey將設景300年前嘅北美原著民族，由《末世街10號》導演Dan Trachtenberg執導，Prey將於迪士尼旗下美國獨家嘅hulu平台上線，暫時未知香港Disney+會唔會有得睇。
以上新作美國一定上哂串流平台或者戲院、平台同步，不過因為各個地區版權不一，以上新戲香港好大機會先上戲院大銀幕再到Disney＋，不過最後放映安排就要等迪士尼公布，不過下年一定多戲睇囉！
更多電影文章
電影LOL︳今期睇咩戲 梅艷芳／長津湖／東京貴族女子／藍色恐懼
電影LOL︳Disney+節目晒冷 大量Marvel角色單飛拍劇集
電影LOL︳觀眾陰影太大？ One Piece拍真人版 造型照曝光已經有負評
電影LOL︳BL劇《只因我們天生一對》電影版 12月香港上映
電影LOL︳神奇女俠Gal Gadot演《白雪公主》魔后 網友大呼選角錯晒！
電影LOL︳新一代邦女郎安娜迪艾瑪絲變影壇搶手貨 傳接拍殺神John Wick外傳
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
