【電影LOL】Super Bowl黃金時段 電影宣傳縮水 新片Old 30秒廣告最搶眼

·2 分鐘文章

美國時間2月7日舉行美式足球超級碗賽事,除咗係年度體壇盛事外,對演藝圈同樣重要。重頭戲係極大規模嘅中場表演,演出者無返咁上下分量都撐唔住個場,以往就有Katy Perry、Lady Gaga、J.Lo等天后做表演嘉賓,今年則由加拿大歌手The Weeknd表演。賽事全個北美直播,咁多人睇住真係不容有失!

正因為全國直播,所以賽事間場嘅電視廣告時段超級搶手,各大電影公司都會喺超級碗時段為旗下新片賣廣告,似足迷你節目巡禮。不過今年廣告因為疫情關係大為失色,唔少廣告商cut budget無落廣告,一係將預算轉投慈善用途!今年最有話題應該係「甜茶」 Timothy Chalamet同雲露娜維達玩返《幻海奇緣》條橋嘅汽車廣告!

電影廣告方面簡直大縮水!數埋得5套電影廣告,包括Eddie Murphy事隔30年翻炒嘅Coming to America 2、迪士尼串流平台戲院同步上映嘅動畫Raya and the Last Dragon、餘下3套電影同屬環球影業,分別為原定上年上映嘅《F9狂野時速》及《殺神Nobody》,以及首次曝光嘅新片Old!

Old係扭橋扭足20年嘅《思.裂》、《異能仨》導演M. Night Shyamalan新作,故事改編自Pierre Oscar Levy及Frederik Peeters創作嘅圖像小說Sand Castle。講述來自不同地方嘅遊客,包括一家四口、一對年輕情侶、一個難民等齊齊來到一個與世隔絕嘅水清沙幼嘅海灘,起初相安無事,人人享受陽光與海灘。但係發現一具女屍後,各人身體產生變化,小孩一刻長大,極速變老!

電影由《聖.教.慾》、《向政府說不》西班牙男星Gael García Bernal,及於《祖孽》中飾演被鬼上身Peter而爆紅嘅Alex Wolff主演。廣告得短短30秒,望落幾吸引,扭橋、伏筆等一向係M. Night Shyamalan嘅一貫風格,相信電影唔會照原著照搬上銀幕,所以唔睇到尾怕且唔會知點解呢班人會被困住走唔到,同點解個沙灘會會令人變老!

電影預計於7月23日美國上映,希望佢如期上到啦!

更多電影文章

【電影LOL】大半生都在演戲 細數基斯杜化龐馬佳作 晚年演基爸奪奧斯卡

【電影LOL】BL劇大熱 推介台劇《WBL》系列 腐女睇到心心眼

【電影LOL】金球獎提名公布 Netflix出品22項提名力壓傳統片商 《天能》得一項提名!

【電影LOL】VCD年代熱賣驚慄之作《心慌方》 日本翻拍新版10月上映

【電影LOL】GME股民鬥大鱷未完 美高梅扑鎚買故事版權開拍電影

【電影LOL】宋仲基科幻大片《勝利號》攻佔Netflix賀歲檔 孔劉朴寶劍科幻新片不日上映

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!