【電影LOL】宋仲基科幻大片《勝利號》攻佔Netflix賀歲檔 孔劉朴寶劍科幻新片不日上映

戲院被停業多時，嚟緊農曆新年能否重開成疑，今年隨時無賀歲檔，要止戲癮唯有暫時轉投串流平台。龍頭大哥Netflix自家開拍大量劇集以外，買亞洲電影亦絕不手軟，嚟緊2月5日就有由男神宋仲基主演嘅科幻大片《勝利號》上架！

《勝利號》係宋仲基繼《狼少年：不朽的愛》後再次同導演趙成熙合作，今次唔拍愛情轉行科幻，衝出太空做清潔工人，故事講述太空船勝利號靠清理太空垃圾賺錢，有錢咩都得嘅船員泰浩（宋仲基 飾）、駕駛員Tiger樸（《炸雞特攻隊》陳善奎飾）及機器人業童（柳海真飾）從垃圾堆中救出小女孩，帶返勝利號後先發現女孩真身實為極危險殺人武器！

船長（《下女誘罪》金泰梨 飾）本來反對賣走女孩賺錢，不過一聽到個黑市價就懶理道德，決定賣人！不過，黑市買賣邊有咁易做，成個交易根本搵命搏，想賺多少少結果被多路人馬追殺！

《勝利號》用上大量電腦特效，太空追逐開戰畫面拍得住荷里活製作，拍攝成本極高嘅《勝》原訂於戲院大銀幕上演。可惜因為疫情關係，各地戲院營業規模不一，所以最後決定轉投Netflix，於全球190個地區上映，韓片fans不容錯過！

睇嚟科幻片喺韓國大熱，排住隊上映嘅仲有《複製人徐福》，由2大男神孔劉同朴寶劍主演。故事講述前特工閔奇憲（孔劉 飾）有病在身，時日無多，其上司賦予國家級秘密保護任務，並承諾事成後會醫好佢。

閔奇憲來到實驗室首次與擁有神秘力量的複製人徐福（朴寶劍 飾）見面，徐福外表似成人但內在得10歲，而且從未離開過實驗室，對外面世界一切事物充滿好奇。二人從離開實驗室開始，便要面對來自四面八方想消滅徐福的勢力。閔奇憲一人面對軍隊嘅追撃，單人匹馬保護徐福。

2大韓國男神合作加上「永生」、「複製」等題材，開拍之時已經有大量新聞，可惜南韓同樣受疫情影響，片期一改再改，原訂剛過嘅聖誕節上映都要改期到今年，《複》香港已經有片商買入，暫時仲未知幾時先可以睇到孔劉同朴寶劍，唯有繼續等消息啦！

更多電影文章

【電影LOL】重組藍可兒懸案 Netflix紀錄片過年前夕推出 驚過睇鬼片！

【電影LOL】Kristen Stewart新片演戴安娜王妃 劇照流出造型超似！

【電影LOL】開業年幾 UA放售K11 Art House 經營權 MCL 5600萬逆市發圍

【電影LOL】《哈利波特》重啟？盛傳籌拍劇集版及20周年電影

【電影LOL】網民惡搞Pepe蛙變壞蛋 紀錄片Feels Good Man剖析「改邪歸正」之路

【電影LOL】拜登上台贈興？總統、第一夫人傳記片輪住拍 Dennis Quaid演列根

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！