【藍可兒懸案】Netflix紀錄片重組案情過年前夕推出 驚過睇鬼片！

過年睇賀歲片是常識吧。翻煲N次《家有囍事》同《嚦咕嚦咕新年財》之後，要唔要搵啲驚嚇嘢溝下貨？

喺美國轟動一時嘅藍可兒死亡懸案，唔覺唔覺就快8年。事隔多年仲未破案，可能係太多離奇疑點。2013年1月底，喺加拿大溫哥華讀大學嘅21歲華裔女生藍可兒，原定南下美國加州Santa Cruz，但係入住目的地以南560公里嘅洛杉磯Cecil Hotel。呢間酒店惡名昭彰，附近治安唔好之餘，酒店本身發生過多宗兇案，甚至被形容「差唔多每間房都死過人」。藍可兒點解會去咗洛杉磯仲住間咁嘅酒店已經係一大疑團。

警方發佈嘅閉路電視片段中，見到藍可兒神情有異而且行為古怪，片段成為網路熱話，睇到人毛骨悚然。

後來藍可兒同家人失去聯絡，屋企人報警並到當地尋人。唔夠一個月，酒店住客投訴食水有怪味，工人喺酒店天台水缸發現藍可兒嘅屍體。2013年6月，洛杉磯警方判斷藍可兒死於意外溺斃。

今次Netflix搵到拍過《與殺人魔對話：泰德·邦迪訪談錄》（Conversations with a Killer: The Ted Bundy Tapes）嘅Joe Berlinger主理呢套《犯罪現場：賽西爾酒店失蹤事件》（Crime Scene - The Vanishing at the Cecil Hotel)，透過訪問調查人員、酒店住客及員工等等，嘗試重組案情，分析案中疑點︰點解藍可兒會去咗唔順路嘅洛杉磯？佢喺酒店電梯嘅奇怪舉動係發生咩事？點解佢可以上到天台？

呢單案咁多懸疑位，一早都有電影人想改編。曾經有報導話Sony Pictures本來計劃開拍呢個故事，導演係拍過英劇版《神探福爾摩斯》嘅Jeremy Lovering，藍可兒一角仲盛傳搵高圓圓擔演。不過一路只聞樓梯響，到2016年就正式宣布計劃中止。

《犯罪現場：賽西爾酒店失蹤事件》將會喺2月10日上架，留返新年假期深夜先睇，真係喜氣洋洋呀～～

更多電影文章

【電影LOL】Kristen Stewart新片演戴安娜王妃 劇照流出造型超似！

【電影LOL】開業年幾 UA放售K11 Art House 經營權 MCL 5600萬逆市發圍

【電影LOL】《哈利波特》重啟？盛傳籌拍劇集版及20周年電影

【電影LOL】網民惡搞Pepe蛙變壞蛋 紀錄片Feels Good Man剖析「改邪歸正」之路

【電影LOL】拜登上台贈興？總統、第一夫人傳記片輪住拍 Dennis Quaid演列根

【電影LOL】牛年賀歲港產片 《狂舞派3》《不日成婚》《唐伯虎之偷天換日》有冇機會上畫？

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！