【電影LOL】開業年幾 UA放售K11 Art House 經營權 MCL 5600萬逆市發圍

睇財經版都搵到電影圈新聞！上市公司豐德麗剛剛出咗通告，其中主要交易部份「收購出售資產及就租賃與約務更替協議有關之使用權資產收購」公布戲院易手事宜，以5600萬向UA院線收購尖沙咀K11 Art House戲院硬件及經營權，有效期為今年3月1日至2031年1月3日。講多少少資料，豐德麗控股係寰亞電影以及MCL院線嘅母公司，住九龍灣德福花園嘅一定去過佢地旗下戲院睇戲。

香港戲院通常喺商場入面，屬於佔地較大嘅租戶之一，由於結構上戲院需要配合銀幕，樓底要夠高，地產商於商場計劃初期已經要決定咗個場有無戲院；再加上戲院入面有大量硬件如座位、投影、音響等等，裝修成本比一般租戶高得多，所以佢咃份租約特別長。

香港咩都變得好快，租約期長嘅戲院變相成為地標，所以久唔久聽到某戲院結業會覺得可惜，實情係因為租約期滿，續約定轉手就睇院線之間點競爭。通常事隔幾個月就會由另一院線喺原址開業，好似MCL將於2023年起以1.23億基本租金接替百老匯院線，經營The One戲院。

租約期滿轉租成數十分高，朗豪坊、九龍塘等差唔多間間戲院都轉過手，MCL承接The One戲院唔出奇，但係通告之中比較唔尋常嘅係豐德麗收購UA K11 Art House戲院！

叫自己做「文化矽谷」嘅K11 MUSEA商場2019年8月先重新開業，個場確實好揼本，睇得出好用心搞裝修設計，仲搵咗好多外地品牌進駐。可惜個場嘅運認真麻麻，開業無耐遇上世紀疫情，戲院幾靚都無用，多次停業，收入受重創！

K11 Art House作為UA旗鑑店，年幾前開業風光開業，仲特別為呢間戲院另開專屬會員，連戲院職員套制服都寧舍唔同，12 個影廳加全港首個IMAX® Laser放映系統，有成1,708 個座位，軟硬件花費不菲。不過2020年對於依賴戲院業務嘅UA嚟講簡直係惡夢，使咗大舊錢落間龍頭戲院度，點知無得做生意，有出無入，唔排除UA因為財務壓力，唯有將間開業只有一年幾嘅戲院轉手套現！

市道差反而成為MCL發圍嘅好時機，母公司業務多樣化，就算2020上半年媒體娛樂、電影及戲院業務蝕咗8.4億，都仲夠財力以5600萬買起K11 Art House。計埋尖沙咀The One，MCL喺呢區堪稱睇戲首選，下一步會唔會劍指成為香港院線龍頭？

更多電影文章

【電影LOL】《哈利波特》重啟？盛傳籌拍劇集版及20周年電影

【電影LOL】網民惡搞Pepe蛙變壞蛋 紀錄片Feels Good Man剖析「改邪歸正」之路

【電影LOL】拜登上台贈興？總統、第一夫人傳記片輪住拍 Dennis Quaid演列根

【電影LOL】牛年賀歲港產片 《狂舞派3》《不日成婚》《唐伯虎之偷天換日》有冇機會上畫？

【電影LOL】等睇《天竺鼠車車》？不如睇《屁屁偵探》劇場版頂吓癮

【電影LOL】電影評論學會大獎 《理大圍城》膺最佳電影 鞏俐奪最佳女演員

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！