【電影LOL】VCD年代熱賣驚慄之作《心慌方》 日本翻拍新版10月上映

·3 分鐘文章

密室逃脫玩過未?早於1997年就有人將「密室逃脫」遊戲拍成驚慄血腥版電影《心慌方》(Cube)。由Vincenzo Natali執導嘅《心》,故事講述分別為大學生、醫生、越獄專家、警察及密室外部設計師等6人,喺不知原由嘅情況下被困於立方體密室之中,要搵出口必需要過5關斬6將,迷宮中每1個立方體各有機關,可能致命亦有可能係出路。

幾個主角起初信心滿滿團結一致相信自己可以逃出生天,越獄專家教大家掉隻鞋入密室試下有無機關,可惜唔work,一樣中招!其後陸續遇到人肉切碎機、強酸噴射、聲控出針,隨時有機會被斬首等機關,過程中受傷或死亡!不過電影唔止有血腥場面,最為人心慌嘅係人心,幾個人面對死亡壓力盡顯陰暗面,警察Quentin控制慾極強,開首做團隊首領勇猛犯險似足英雄,及後慢慢變質,要求其他人絕對服從否則殺無赦,最後搵到出口,唔係先逃生反而係動殺機,殺害同伴!

《心》屬低成本獨立制作,不過憑住每個主角性格鮮明:醫生大愛但衝動;大學生人云亦云,懦弱怕事,慢慢展現智慧成為團隊大腦,洞悉房間解密關鍵;設計師生存慾望極低,最後犧牲自己救人。複雜人性比血腥機關更好睇,喺口碑之下成為CULT片代表,之後仲拍多2兩集《心慌方2》及Cube Zero!當VCD鋪仲成行成市嘅年代,呢套戲都係當年碟鋪門口大電視播放吸客之選。

事隔多年,《心》再次重現大銀幕,今次由日本松竹翻拍,卡士有當紅演員包括菅田將暉、岡田將生、《晝顏》斎藤工、杏、《大叔的愛》吉田鋼太郎及新人田代輝主演。日版同原裝設定有些微改動,角色職業唔同咗,原本2個女角變成得杏一個,而起咗關鍵作用嘅計數天才就改成13歲少年。

日版《心慌方》由《大叔的愛》編劇德尾浩司執筆,清水康彥執導,原裝導演Vincenzo擔任電影嘅創意總監,暫時未知電影有幾血腥,會唔會跟足原版有碎屍場面,不過相信人性部份要再落多啲功夫,因為比起90年代,人性變得更複雜,而且觀眾口味大有不同!電影預計今年10月於日本上映。

更多電影文章

【電影LOL】GME股民鬥大鱷未完 美高梅扑鎚買故事版權開拍電影

【電影LOL】宋仲基科幻大片《勝利號》攻佔Netflix賀歲檔 孔劉朴寶劍科幻新片不日上映

【電影LOL】重組藍可兒懸案 Netflix紀錄片過年前夕推出 驚過睇鬼片!

【電影LOL】Kristen Stewart新片演戴安娜王妃 劇照流出造型超似!

【電影LOL】開業年幾 UA放售K11 Art House 經營權 MCL 5600萬逆市發圍

【電影LOL】《哈利波特》重啟?盛傳籌拍劇集版及20周年電影

按此下載全新應用程式Yahoo APP,並以Yahoo電郵免費登記成為會員,即時可完成簡單任務賺取Ypoints,憑分即可換領不同獎賞! 新人更可即時換領限量新人禮,立即下載!