黃智賢冇簽TVB藝人約四線發展 自揭《潛行狙擊》辣薑一角險被搶走

由黃智賢(Ben)、李思捷、唐文龍、曹永廉及麥長青組成嘅大齡男團Hey Brother早前出道，5個人個個5字頭，就係要證明追夢不分年齡。成員之一嘅黃智賢早前受訪，提到5位成員都唔係一帆風順，而組團就係由李思捷同曹永廉打幾個電話搞掂。原來黃智賢同Hey Brother另外4位隊友本來互有交情，黃智賢同麥長青多年前一齊主持《閃電傳真機》，曹永廉出唱片前就認識阿Ben，同李思捷曾經係同一個經理人，而唐文龍就因為認識曹永廉同鄭嘉穎，因此同黃智賢做埋friend。

黃智賢一度離開TVB，到2004年回巢，但係受過冷眼，同合作過嘅監製打招呼卻換來反應冷淡。Ben喺訪問都提到，2011年為佢帶來TVB台慶頒獎禮最佳男配角獎嘅《潛行狙擊》卧底辣薑一角，原來差啲畀另一位主動要求演辣薑嘅搶走，幸得幕後力保先至把握到機會。

今年58歲嘅黃智賢同TVB現時只簽部頭演員約，經理人合約已經冇續簽，原因係想搵更大自由度。曾經只想專心做戲嘅Ben，都要好似時下年青人咁做「斜槓族」，演員之外仲打理護膚品品牌，連同Hey Brother成員以及團隊填詞擔當，可以話係四線發展。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！