2024離巢TVB藝人盤點！「三料冠軍」轉行做老師 馮素波直言無綫制度唔啱年長人士

TVB每年都有唔少新人出道，同時又有舊人相繼離巢，成為「脫無者」，2024年離巢TVB嘅藝人囊括資深演員及多位女神級藝人。即刻睇睇你記唔記得佢哋，定係連佢哋離開咗TVB向外闖都唔知呢。

2024離巢TVB藝人1. 蘇韻姿
蘇韻姿（Andrea）以2016年香港小姐殿軍身份簽約TVB，憑TVB處境劇《愛．回家之開心速遞》「熊心如」一角成功入屋，但疑因屢次埋位遲到問題未有改善而遭雪藏，劇情以熊心如要跟前男友朱天梯（梁証嘉飾）到歐洲視察廠房離開香港，蘇韻姿就再無出現於《愛回家》，亦都無咩其他工作。期間，蘇韻姿試過解凍，拍攝劇集《非份之罪》及《黑色月光》，不過於今年4月初宣布約滿離巢TVB，回復自由身後，蘇韻姿分別於音樂學校任教，參與幕後製作，以及為HOY TV主持節目和參演劇集《我愛九龍城》。

2024離巢TVB藝人2. 邵珮詩
邵珮詩（Veronica）於2014年參選香港小姐競選，勇奪「最上鏡小姐」、「友誼小姐」及「冠軍」獎項，成為「三料冠軍」，不過工作機會一直唔夠其他港姐多，故有「被遺忘港姐」之稱。今年7月，邵珮詩於社交平台撰長文表示已正式離巢TVB，將積極主持MC活動、做義工及參與慈善工作。邵珮詩除咗有瑜伽導師牌開班教學生，早前亦做埋兒童品格教育家，透過分享品格價值觀方面嘅知識和經驗幫助小朋友建立信心。

2024離巢TVB藝人3. 鄭世豪
鄭世豪於TVB處境劇《愛．回家之開心速遞》飾演「細龍生」一角深受歡迎，今年5月離巢效力24年嘅TVB，因此劇情以「細龍生」調往阿拉斯加分公司交代。離開TVB後，鄭世豪經營音樂學校，教音樂和戲劇，將個人經驗理念分享，又於9月份灌錄新歌《聞住你陣除》，直言與喺TVB嗰陣收入差唔多。

2024離巢TVB藝人4. 蔡嘉欣
蔡嘉欣2019年選港姐入行，當年5強止步後就成為TVB旗下藝人，並隨即獲力捧加入《姊妹淘》成為固定主持班底，又曾主持旅遊節目《眼睛去旅行》及參與《飛虎3壯志英雄》及《智能愛人》劇集拍攝。蔡嘉欣曾於社交平台大曬40萬現金、名牌手袋，又曾喺《姊妹淘》中自爆男友每年送5位數字支票作生日禮物，因而被指「拜金」。今年9月，蔡嘉欣宣布離巢，於出席活動時表示自己未來會朝著KOL方向發展，又透露TVB有循例問句「會唔會考慮續約？」，但佢話唔考慮之後，對話就結束。

2024離巢TVB藝人5. 謝東閔
謝東閔2010年透過《超級巨聲2》入行，不過並唔係以唱歌作主要發展，反而僅推出劇集歌曲，並以拍攝劇集為主。謝東閔近年於演戲方面愈見進步，例如2022年於《黯夜守護者》飾演遊戲開發商李文杰，亦係劇中Big Boss神秘毒販「挪亞方舟」，因為內心世界複雜，需要用大量眼神交代情節，所以事前都落咗唔少準備功夫。今年初又喺《本尊就位》首次擔任男主角，表現不俗，可惜謝東閔於8月宣布離巢TVB。

2024離巢TVB藝人6. 馮素波
馮素波（波姐）由童星入行，效力TVB已三十多年，今年3月佢就宣布約滿離巢，並指感恩過去在TVB得到嘅一切。馮素波其後接受訪問，表示TVB當時無挽留佢，又指TVB制度對年長人士唔係咁適合，寧願和平分開，喺外面自由發展。馮素波離巢TVB後緊貼潮流，積極經營社交平台和YouTube頻道《貼地嫲嫲馮素波》。

2024離巢TVB藝人7. 菊梓喬
菊梓喬（Hana）入行至今8年，過去有著「星夢一姐」之稱號，曾三度蟬聯TVB「最受歡迎女歌星」，不過自伯樂何哲圖離開TVB後，其氣勢亦大不如前。菊梓喬約滿星夢娛樂就與何哲圖再續前緣，加盟對方旗下新公司星演國際，並於5月底推出第一首歌曲《萬年》。

2024離巢TVB藝人8. 姜麗文
姜麗文（Lesley）當年與哥哥姜文杰組成兄妹檔Benji and Lesley以音樂人身份追夢，2017年姜麗文簽約TVB成為旗下藝人，不過佢並無因「星二代」身份而得到特別厚待，反而選擇默默耕耘，終於憑《開心速遞》外傭Lisa一角成功入屋，及後於《星空下的仁醫》飾演病童母親，演技大獲好評。12月，姜麗文於社交平台發文宣布結束喺TVB 7年嘅工作旅程，直言將會繼續全心投入演員和創作歌手工作。

除咗以上8位藝人，於2024年離巢TVB嘅藝人仲有蕭徽勇、蘇可欣、翟威廉、楊潮凱、容羨媛、劉溫馨、利穎怡、杜穎珊、李漫芬、林穎彤、曾淑雅、甄采浠、吳紫韻、魏柏豪、李思雅、譚坤倫、文雪兒、連詩雅、吳洛汶、林熹瞳、容羡媛，以及杜燕歌等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！