Me&互送自製聖誕咭滿滿心思 難忘抽獎中伏Vian捧大西瓜 淑蔓獲嬰兒補藥

女團Me&的黃淑蔓（Feanna）與連家穎（Vian）最近化身聖誕精靈，推出充滿節日氣氛的跳唱作品《Me& My Christmas Town》。佳節將至，她們為對方親手製作獨一無二的愛心聖誕咭，Feanna花盡心思設計，Vian寫下滿滿的深情說話，好sweet！雖然Vian嫌稱「畫功零蛋」，但她畫了Feanna最愛的卡通人物和情話，成功打動她和全場工作人員，勝出臨時舉行「Me&第一屆聖誕咭設計大賽」！

交換聖誕咭前，Feanna自信滿滿：「我覺得我會贏！」而Vian自爆求學時美術科經常捧蛋，笑說：「平時我無信心畫嘢，但今次我嘅勝負慾爆發！」倒數三聲後，她們互相拿出作品，Feanna首先歡呼尖叫：「好靚呀，勁靚呀，大眼仔呀！多謝！」打開張咭，她再嘩多聲：「咁多字？要讀晒出嚟？（讀你最鍾意嗰啲句）『Dearest Feanna』！」二人對望大笑。

至於Vian收到Feanna的聖誕咭時亦好興奮，然後一臉狐疑，因為咭面的大紅心中間有一個小小缺口，Feanna示意Vian用手「拆」解她設計的聖誕咭，撕開紅心就見到寫在裏面的祝福說話，寓意開開心心，好玩又有心思，Vian好感動！

每年聖誕節Me&都會和朋友開party，最難忘是抽到「伏」禮物，Feanna表示最離譜是兒童藥物，全場爆笑，她笑說：「每年我都會將屋企唔等使嘅嘢儲埋，留返喺聖誕party抽獎，交換禮物，送晒出去。我唔明啲人點解要專登去買一件伏禮物去抽獎？因為我全屋都係。」Vian憶述最爆笑一次抽禮物經歷：「大家都對最大嗰份禮物虎視眈眈，結果我好好彩咁抽中咗，我一層一層咁樣撕開啲報紙，原來係個西瓜！」Feanna安慰她說：「西瓜好過冇，只少可以食，我欣賞所有送食物嘅朋友。」Vian：「咁又係，起碼有得食！不過聖誕節冬天食西瓜，就真係幾搞笑特別嘅體驗。」當她們知道綠色紅色的西瓜，與聖誕節非常吻合時，恍然大悟！

問到最想去哪慶祝聖誕？她們異口同聲「芬蘭」，Vian：「我哋都係浪漫因子爆棚和好重儀式感嘅人，亦好鍾意聖誕節，芬蘭嘅聖誕老人村係我哋夢寐以求嘅地方。」Feanna又說：「我覺得Vian好似《胡桃夾子》裏面跳芭蕾舞嗰個女仔，因為佢身材好好，我經常貪圖佢嘅身材，佢着粉紅色真係好靚，好似教完小朋友上芭蕾舞堂嘅老師。而且跳舞好叻，所以我好想聖誕節見到佢喺個台上面跳舞。」

而Vian指Feanna令她聯想到「聖誕老人」，Feanna笑說：「我以為你會話我似薑餅人，因為圓轆轆。」Vian解釋她每次出現都令人感到歡樂，說：「Feanna令周圍嘅都會充滿好好嘅能量，同見到聖誕老人出現派聖誕禮物一樣咁開心，帶咗好多歡樂俾大家，應該係『聖誕女郎』。」