奪命提示︱TVB新一代打女劉穎鏇展現弗爆「最強Body 3.0」 網民：好搏命

TVB新劇《奪命提示》喺前日（17日）正式開播，劇集搵嚟陳山聰、劉穎鏇（Tiffany）、張振朗、劉佩玥、林子善、丁子朗及郭柏妍等人主演，而被封TVB「最強Body」嘅劉穎鏇繼《超能使者》及《隱形戰隊》後，再次以「性感打女」形象示人，施展渾身解數落力演出，而「最強Body 3.0」亦比2.0更勝一籌！

《奪命提示》噚晚（18日）嘅劇情繼續圍繞「鋸腳狂魔」案，臥底警員溫嘉莉（劉穎鏇飾）喺探望招俊朗（張振朗飾）患白血病契女時，竟然重遇人間蒸發幾年嘅招俊朗並責怪佢無情。溫嘉莉喺執行任務期間身陷險境，而招俊朗違抗命令及不顧安危地拯救佢，與「鋸腳狂魔」兵宋耀興展開一場激烈嘅槍戰。

噚晚嘅精彩打鬥場面，睇到觀眾目不轉睛兼讚不絕口，除咗劉穎鏇騎上陳少邦膊頭後衝身後多排長光管之外，仲有多張槍戰及紮實打鬥場面。同時亦有大量網民留意劉穎鏇嘅「最強Body 3.0」，操出完美蛇腰與結實嘅背肌及腹肌，紛紛留言大讚，例如「呢套野就係俾劉穎璇瘋狂show佢嘅腹肌」、「講真 已經完全冇心情睇啲打鬥」、「好搏命」、「睇到嘩嘩聲😘」、「真心真係睇到～嘩～嘩～聲👍 做打女真的好堅👏👍」、「好鐘意Tiffany, 得天獨厚, 我係女人都對佢心心眼😍」、「要樣有樣 要腳有腳 文武雙全」、「奪命長腿」、「Fit到爆」、「超fit🥳🥳🥳打得好勁」、「對腳冇得頂」、「超靚身形樣貌殺死人‼️」及「好精彩！好耐冇喺電視睇到呢啲場面。劉穎鏇真係好博，一次比一次進步👍」等等；不過同時亦有網民認為劇集賣弄性感，留言話「次次睇佢拍打戲都著成咁？咁著好打啲嘅咩？講真完全唔想睇」、「唔賣性感好啲，健康形象應該著返啲正常衫」、「套套劇都係賣弄呢D！好悶！」、「賣弄色情」及「套嘢真係係咁賣肉」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！