盧國沾逝世︳慧眼發掘羅嘉良郭晉安卻鬧上法庭 多年後和好師徒同台

多家傳媒報導指，香港殿堂級填詞人盧國沾周三（19日）逝世，享年76歲。外界對盧國沾嘅印象除咗作品家傳戶曉之外，佢同2位徒弟羅嘉良及郭晉安一度交惡，亦曾經係娛樂頭條。

入行前係地產公司繪圖員嘅羅嘉良，1984年參加由TVB主辦嘅第3屆新秀歌唱大賽，雖然空手而回，但羅嘉良被盧國沾睇中，並簽入盧的經理人公司。當時盧國沾為亞視多部劇集負責音樂，羅嘉良順理成章有機會為亞視唱劇集歌。當中最為人熟知嘅應該係盧國沾只係用半個鐘頭就寫好嘅《秦始皇》主題曲，以一句「大地在我腳下」展現霸氣，亦令份屬新人嘅羅嘉良打響名堂。後來羅嘉良跳槽去TVB，都係盧國沾穿針引線。

羅嘉良盧國沾呢對師徒喺1992年卻因經理人合約糾紛對簿公堂，「撈家」與盧國沾另一位旗下藝人郭晉安控告盧國沾訛騙及製造假文件，最終盧國沾未被定罪，但與羅嘉良郭晉安鬧翻，解約收場，而且多年不相往來。

直到2015年，盧國沾獲港台十大中文金曲頒獎典禮頒發終身榮譽「金針獎」，羅嘉良喺致敬環節獻唱《秦始皇》，更透露二人早幾年已經和好，羅嘉良亦不忘感謝恩師。翌年盧國沾喺紅館舉行作品演唱會，陪同坐輪椅嘅盧國沾上台者，正是羅嘉良。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！