張慧儀正式否認係劈腿6富豪意外懷孕女星︰大不了驗DNA
鄧兆尊早前於網上節目《娛樂好好玩》爆料，指某圈中女星另一位90年代女星同時與4至6名富商交往，後來仲發現懷孕，女星問兆尊應該點做，之後仲同各位富商男友攤牌，結果冇人認頭，各自俾100萬女星當分手費。育有養子嘅張慧儀成為嫌疑人物之一，佢喺鍾慧冰YouTube頻道節目預告中嬲爆爆回應「我係非常之嬲﹗」、「不要再製造謠言！大家有冇諗過，對嗰個小朋友係有幾大嘅影響！你好好玩咩？好好笑咩呢啲嘢？」。
張慧儀正式回應「未婚懷孕」事件嘅節目日前上架，對於成為「一劈六」傳聞主角，張慧儀話「我冇咁犀利」，後來發現越傳越過火，有內地直播主以話題做幾集節目，甚至以張之養子Hanson外表做話題，「我個仔有少少哨牙，就話同某某富豪一樣樣，哨牙嘅！跟住又話我個仔，因為我個仔講普通話，佢講廣東話唔係咁標準，又會講『某富豪爸爸佢哋講潮州話㗎，潮州講廣東話嘅嗰啲口音』」。
最令慧儀火滾係，有網民貼出同「鄧某某」嘅合照，有人留言話「想知拎咗富豪100萬嘅女星係邊個」，原post主居然開名指係張慧儀，令到本尊親身留言「不要再製造謠言」再加2個感歎號，原post主知衰立即刪文。節目中張慧儀認真地回應傳聞，「我覺得呢啲嘢唔係好玩……我係好認真澄清呢個絕對唔係我，我一啲都唔驚，大不了驗DNA，或者乜都得，我一啲都唔驚！」。同時張慧儀認為呢個話題要完，以免影響當事人。「我覺得唔好攞呢啲嘢嚟開玩笑。如果真有其人嘅話，俾大家真係發掘到呢個人咁點？大家有冇諗過對嗰個小朋友係有幾大影響？好好玩咩？好好笑咩？我覺得唔好啦，我覺得到此為止，亦都唔需要再去猜測，呢個話題應該到此結束。」
早前有報導指張慧儀19歲嘅養子Hanson讀緊神學，喺節目中儀就此否認，只係話個仔讀緊同耶穌基督有關課程，而Hanson好鍾意返教會幫手，慧儀話如果個仔想做牧師等嘅工作，只要係合理佢都會支持。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
