魯振順向許濤表達訴求指cut show導致收入大減 直言「洗碗隨時仲多過我份糧」

TVB日前公布2024年度業績，虧損收窄36%至4.91億元，更表示下半年扭虧，錄得5300萬元盈利。行政主席許濤表示預計2025年可轉虧為盈，同時指未來會「全面擁抱AI」。上星期四（27日）許濤召集藝員返回公司出席會議，藉此聽取藝員意見。

有報道指當日有近百藝員出席，除咗許主席之外，電視廣播有限公司執行董事曾勵珍，助理總經理（藝員管理及發展）樂易玲，77工作室總監鍾澍佳都有出席，而總經理曾志偉則未有現身。據講現場氣氛充滿正能量，不過有傳TVB綠葉王之一嘅魯振順喺期間向許濤發表長達10分鐘以上嘅訴求，激動指近年不時cut show導致收入大減，而許主席亦有細心聆聽會嘅訴求。

有傳媒向魯振順查詢，而佢亦表示當日有出席會議，兼表達咗數項訴求，佢表示希望可以得到公平同應有嘅對待，雖然佢明白每一間公司都會有艱難嘅時刻，不過佢都要交租同過正常嘅生活，更指全職洗碗嘅工作隨時多過佢份糧。佢仲話自己試過被hold起檔期拍劇，不過就一直冇被安排入組，之後佢先知道由於劇本嘅改動，原有角色被刪除，即係佢檔期被hold不過冇工開。另外，佢亦希望公司可以珍惜員工，特別係已經買少見少嘅綠葉藝員，因為走下又一個，再唔珍惜嘅話就無。

現年67歲嘅魯振順嘅合約即將到期，而佢近日亦有同公司洽談續約事宜。雖然佢有怨氣，不過都無離巢嘅諗法，仲話做生不如做熟，只要公司安排角色，佢都會做到同做好。魯振順表示自己有積穀防饑，未需要做兼職搵錢，不過都要交租同養家，希望公司可以畀返應有嘅利益畀大家。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！