68歲呂良偉孖老婆楊小娟恩愛貼地行街市買餸 投資有道傳身家數十億

68歲有「不老男神」之稱嘅呂良偉於2001年與百億身家嘅楊小娟結婚，結婚多年仍恩愛如初，不時結伴外出，甚至到街市買餸；日前，呂良偉於社交平台分享與老婆楊小娟到鴨脷洲街市買餸及食海鮮嘅影片，二人對街市環境相當熟悉，又與粉絲合照，極度親民。

從影片中看到，呂良偉與楊小娟到鴨脷洲街市買餸，同場更有甄子丹夫婦。呂良偉與楊小娟以牛仔外套示人，並戴上黑超，呂良偉亦戴上LV淺土黃色Cap帽，時尚又具造型感。呂良偉與楊小娟係鴨脷洲街市嘅熟客，表示經常到呢個街市買海鮮，大讚海鮮新鮮，價格又便宜。買餸期間，有粉絲要求合照，呂良偉都非常友善地答應，超級親民無架子。

楊小娟相當旺夫；婚後，呂良偉除咗化身百億駙馬，亦積極投資，包括於內地投資娛樂公司及創辦廣告公司，生意遍布全國一線城市，以及喺香港開設醫學美容中心，有指二人身家高達數十億。呂良偉與楊小娟平日嘅衣著打扮極貴氣，每每都會成為焦點，楊小娟曾經試過全身上下名牌到街市買餸及食大排檔，又曾於早前搭高鐵回鄉探父母時，手上戴上珠寶、名錶，以及手拿名牌手袋，全部均價值不菲。呂良偉與楊小娟育有22歲獨子呂善揚，畢業於英國著名學府劍橋大學，被指係星二代筍盤，不過呂良偉曾於接受訪問時透露曾叮囑兒子要學識財政獨立，表示自己嘅錢唔屬於囝囝，技能同知識先係佢嘅財富，用爸爸嘅錢就要睇面色，但如果囝囝自己搵到錢就可以自我主宰點用。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！