鄧兆尊同張慧儀就未婚懷孕話題聯絡 吳家樂不點名指主持人跣人一鑊

鄧兆尊月前於網上節目《娛樂好好玩》爆料，指某圈中女星另一位90年代女星同時與4至6名富商交往，後來仲發現懷孕，女星同各位富商男友攤牌結果冇人認頭，仲各自俾100萬女星當分手費。育有養子嘅張慧儀成為嫌疑人物之一，佢喺鍾慧冰YouTube頻道節目預告中嬲爆爆回應「我係非常之嬲﹗」、「不要再製造謠言！大家有冇諗過，對嗰個小朋友係有幾大嘅影響！你好好玩咩？好好笑咩呢啲嘢？」。

鄧兆尊日前再現身《娛樂好好玩》，並喺節目表示已經同張慧儀就呢件事私下聯絡，但張慧儀就婉拒喺節目公開討論，而且只係想件事告一段落。鄧兆尊透露張慧儀早於疫情期間應承接受鍾慧冰訪問，但因各種原因到早前先成事，而且係順便回應近期話題。

吳家樂同鄧兆尊討論到「女星劈腿富豪懷孕」話題再炒熱，家樂認為熱度突然升高好奇怪，因為如果張慧儀真係嬲兆尊就唔會隔咁耐先回應，又或者可以喺社交平台親自鬧。家樂同兆尊都認為，張慧儀喺鍾慧冰嘅網上節目回應嘅段落，被節錄成預告嘅片段，喺剪接上放大張慧儀提到「鄧某某」嘅說話反應。吳家樂甚至直言張慧儀上鍾慧冰個節目做訪問，「個主持某程度上係製造咗啲事端出嚟」，鄧兆尊同意之餘亦複述張慧儀同佢講「我都唔係嬲你，都冇話過係你，但出街嘅時候剪到好似我同你有拗撬咁」。

吳家樂其後指，張慧儀在鍾慧冰網上節目預告中批評嘅，係喺社交平台上直指有網民散播謊言，而唔係鄧兆尊。吳家樂甚至指住鍾慧冰節目的截圖話「張慧儀應承咗呢個平台版主做咗個訪問，而呢件事某程度上係有少少跣佢」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！