《拍拖耐了，都要記得浪漫》

又到咗一年一度被節日氣氛淹沒嘅聖誕除夕，今年嘅聖誕除夕都係星期六，有拖拍嘅人又要苦惱呢兩日究竟做啲咩好⋯⋯香港真係一個好悶嘅地方，周圍都係人，我唔係有咩好地方推薦畀你，我係想提醒你，可能已經唔係你哋第一個共渡嘅聖誕節，但係千萬唔好懶惰，記得要兩個人好好地渡過呢一日。

無論拍咗拖幾耐，都唔好忘記偶爾要浪漫一下。可能係生日、情人節、聖誕，總之間唔中都應該為對方用心一下。女仔間唔中煮啲嘢畀男朋友食，男朋友偶爾帶女朋友去一個新地方，簡單又廉價，但最重要嘅係為對方準備小小驚喜。愛情無永遠嘅熱戀期，但要保持你哋戀情嘅熱情浪漫，係絕對需要花小小心機去經營。聖誕節，咪搵啲小浪漫畀對方，好好享受一下節日氣氛。

我所指嘅浪漫唔係要咩名貴禮物，去食咩高級餐廳。浪漫同金錢唔係一定掛鈎，只係我覺得一定要用心，男朋友女朋友都一樣。浪漫可以係兩個人一齊喺屋企煮餐飯，一齊出去睇燈飾，一齊去啲一直想去又未去嘅地方，只需要做一啲平時未必會做嘅野，其實已經好浪漫。男人成日覺得慶祝節日好多餘，其實對女仔來說，真係唔需要咩驚天動地安排，只係知道你有計劃好嗰一日有計劃過，唔係「到時先算啦～求其啦」就已經好好。