歐陽萬成返港與黃子華飯敘 化身小粉絲拎簽名 大呻香港樣樣都講錢

美籍港人棟篤笑藝人歐陽萬成（Jimmy Oyang）憑令華人觀眾感共鳴嘅棟篤笑全球爆紅，更因演出喜劇《硅谷群英》(Silicon Valley)、《我的超豪男友》(Crazy Rich Asians)及Disney+美劇《內景唐人街》(Interior Chinatown)人氣再上升。日前，歐陽萬成返到出生地香港，並於IG限時動態分享香港嘅行程，包括到灣仔及銅鑼灣品嚐美食，不過佢就體現到香港樣樣都講錢嘅生活：「香港真係樣樣嘢都講錢㗎喎！你出去食嘢，紙巾都唔畀你，要買啦，Tempo，兩蚊一包，你要to-go container（外賣餐具），兩蚊啦，oh you want chopsticks with those to-go？fxxk you, pay me! two dollars，樣樣嘢都講錢呀大佬！」有網民就笑言而家兩蚊都買唔到Tempo。歐陽萬成又到戲院觀賞由黃子華主演嘅電影《破地獄》，大讚故事精彩。另外，歐陽萬成PO出與黃子華、C君（鄭詩君）飯敘照片，表示好開心可以同黃子華一齊食潮州菜。

歐陽萬成表示相當欣賞黃子華，寫道：「So happy to meet the brilliant 黃子華He was the first and still the best comedian in Hong Kong. Absolutely my inspiration. （很高興見到才華洋溢嘅黃子華，佢係香港第一個、亦係最好嘅喜劇演員，絕對係我嘅靈感。）I grew up watching in 男親女愛. And his new movie 破地獄 is incredible. 好開心同黃子華一齊食潮州菜。」歐陽萬成指自己係睇《男親女愛》長大，於是當日仲化身小粉絲帶咗《男親女愛》DVD畀黃子華簽名。歐陽萬成與黃子華合體，蔡卓妍（阿Sa）忍唔住留言指：「I love u both!!」，仲有唔少網民都期望二人可以合作：「假如兩個可以搞一次楝篤笑或者拍套喜劇..」、「一齊開show啦！」、「夢幻會面～～～好棒喔」、「Please collab（請合作）、「best hk! 期待你們的合作」等等。

歐陽萬成出生於香港，13歲隨家人移居到美國，喺加州成長。歐陽萬成曾經喺香港華仁書院讀咗一年書，後來畢業於加州大學聖地牙哥分校濟學。對表演充滿熱情嘅歐陽萬成大學畢業後喺美國各地小型俱樂部演出棟篤笑，不過佢始終認為香港文化及廣東話係佢創作嘅重要養分。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！