自閉兒媽媽苦思孩子出路 開麵廠用「歪果」做蔬菜麵 聘自閉員工：不如自己做老闆｜Yahoo
【Yahoo 新聞報道】市面蔬果一旦刮花、撞凹，就成了「歪果」，往往乏人問津。製麵工廠「星星堂」所製的蔬菜麵，原材料就是其貌不揚的「歪果」，創辦人Daisy說：「佢本身個樣醜啫，但佢營養成份無變」。Daisy與拍檔都是自閉症孩子的家長，開麵廠聘請自閉症人士，作為就業培訓的中途站，讓他們了解社會運作，學習「返工」以便投身社會。無論歪果還是自閉症孩子，星星堂都視為珍寶。
「星星堂」顧名思義，就是「星星兒」的學堂。自閉症孩子不擅溝通交際，就像居住在其他星球一樣，故被稱為「星星兒」。Daisy形容，星星兒的性格較特別，未必適應社會規範，「將來自己個細路仔讀完書有咩出路？唔係搵工難，而係搵咗份工，點樣keep住喺份工度做落去」。她遂萌生創業念頭，「與其咁痛苦驚佢畀人炒，不如自己做老闆」，讓一群星星兒不致於畢業後變成隱青。
Daisy運用其專長創業，「師奶最識就係整嘢食」，而且孩子們從事飲食相關工作又容易見到實際成果。最初產品是曲奇餅，因有食譜可遁，令最怕改變的星星兒安心。她七年前申請「伙伴倡自強」計劃的種子基金，當時也是第一間私人企業（非NGO旗下）成功申請。「有個有牌嘅食物工場，就可以將產品推廣出去，同時都可以請多啲人」。多年來星星堂聘請過不少自閉員工，有些仍然在學的來當兼職，有些則已完成學業；也會聘請退休人士及家庭主婦任兼職員工，負責帶領星星兒，同時保持產品質素。
「社交能力怪怪哋，但佢哋本身都係善良」
Daisy經蔬菜統營處接洽下訂來「歪果」，即表面刮花、撞凹，但本身並無變壞，「佢哋話有唔少歪果，唔想浪費」。Daisy形容這些「歪果」都有價值，「佢本身個樣醜啫，但佢營養成份無變」，正如星星堂的員工，「可能外表或者社交能力怪怪哋，但佢哋本身都係善良」。
Daisy想到將歪果打成汁做麵，既不影響產品面貌，又可以善用一眾被「嫌棄」的蔬果，製作菠菜麵、南瓜麵、紅菜頭麵等等。亦有本地農夫主動接洽，「有南瓜豐收就賣啲南瓜畀我哋，幫佢做麵，做咗就畀返佢哋自己銷售」，麵廠也藉此製作西洋菜麵、蘿蔔麵等。星星堂以避免浪費為經營方針，「我哋基本上都無存貨，一落order先做，有時一做就幾百包」，避免存貨太多導致浪費，「希望客人收到個產品都係新鮮嘅」。
港產士多啤梨變果醬 延農作物壽命
有公司亦為星星堂與農夫牽線，延長本地農作物壽命。農心行動慈善有限公司負責人黃美蘭指，過往了解到農夫將約三成過剩農作物或歪果用作堆肥，士多啤梨等保鮮期短的蔬果更易浪費，「我覺得好嘥囉！如果諗到方案令農作物唔可以嘥就好，農民好辛苦」。黃認識星星堂後決定合作，將士多啤梨委託星星堂加工，製作士多啤梨醬。
由製作曲奇餅發展到做飯盒、到會，後來製麵，Daisy希望力攻「主食」市場。最初也有碰壁的時候，「整完啲麵晾起諗住第二日可以收，第二日返嚟所有麵斷晒跌晒落嚟」，可幸之後遇上退休師傅陳師傅，協助研發麵條製作，現時仍是星星堂的兼職員工，「我需要麵嘅時候佢就幫我做麵」。
「返工唔可以遲到、要聽老細話」
為了讓星星兒了解何謂「返工」，Daisy上班時夾起「老闆」名牌，也給兒子和員工夾上「員工牌」，讓他們有「打工賺錢」的概念，「返工唔可以遲到、要聽老細話……希望佢哋裝備咗自己再出去，就可以減少啲錯誤」。Daisy拍檔的兒子也曾在星星堂任職，正在理工大學任清潔工，「而家都做得幾好」。
Daisy希望幫助自閉症人士投身社會，但坦言各人情況不同，有人會在情緒困擾時「坐埋一邊喊」，也有人會情緒突然激動「撻著咗」，她強調：「我唔係話自閉症就係弱勢、要社會遷就，而係希望佢哋適應到大社會」。Daisy指自閉症人士喜愛規律，「好享受重覆又重覆嘅工作」，故勝任影印、釘裝等普通人視為沉悶的工種。「我有個員工好鍾意（為貨品）貼貼紙，佢貼得好靚、貼得好過我」。
「最大嘅收獲，就係見到呢個世界咁善良」
星星堂不少客戶是企業，製作派給僱員的員工禮物，亦有管理公司訂購入伙禮品包送予一眾新屋業主；有客人則訂製結婚回禮或「散水禮物」。星星堂去年7月重新設廠，廠房更四正更大，未來希望製作不同禮盒迎合不同顧客，目前該機構有約12個員工，星星兒佔約半，希望未來增聘8至10人。星星堂現時不少兼職員工是退休人士，「好照顧我啲（星星兒）員工」。她記得疫情期間，有兼職員工更提出：「你有生意先出糧啦！」她感慨萬分，「其實我人生最大嘅收獲，就係見到呢個世界咁善良」。
星星堂
https://www.facebook.com/angelchild.com.hk
