雅虎香港新聞 電影LOL︳《蜘蛛俠：不戰無歸》預告片登場 蛛絲馬跡睇出齊集三代蜘蛛俠？
《蜘蛛俠：不戰無歸》喺1個月後（12月15日）聖誕檔上映，電影近日加緊宣傳力度，早2日出咗電影海報，以MCU加Sony嘅資源及財力，唔知點解張海報設計hea到嘔，大把fans自製嘅海報仲靚啲。不過張海報肯定咗《不戰無歸》中「奇異博士」戲份極重，同「蜘蛛俠」齊齊做男一！
至於大家最期待、亦係傳聞已久嘅蜘蛛俠「三代同堂」係咪成真？早前網上流出多張疑似片場照片，有哂3代蜘蛛俠戲份，仲有幾張第一代「蜘蛛仔」Tobey Maguire、「二代蜘蛛仔」Andrew Garfield及Tom Holland同場嘅側拍。有圖都唔一定有真相，皆因官方一直無確認過，而Andrew Garfield又矢口否認自己有份拍《不戰無歸》！
偏偏今日公布嘅最新預告片繼續賣關子，無見到Tobey Maguire或Andrew Garfield，不過就清楚見哂5位歹角，難得全部原班人馬上陣！包括喺2002年首集《蜘蛛俠》大奸角「綠魔」（Willem Dafoe飾）、2004年《蜘蛛俠2》中登場嘅「八爪魚博士」（Alfred Molina飾）、2007年《蜘蛛俠3》嘅「沙人」（Thomas Haden Church飾)。
仲有同二代對戰嘅歹角，分別為2012年中嘅《蜘蛛俠：驚世現新》「蜥蜴人」（Rhys Ifans飾）及2014年《蜘蛛俠2：決戰電魔》中由Jamie Foxx飾演嘅「電魔」，今次「電魔」唔再喺藍色，造型似返Marvel漫畫著返套甲！
雖然預告片無見到另外2代「蜘蛛俠」，不過其中2幕透露端倪：「八爪魚博士」同Tom Holland飾嘅「蜘蛛俠」對戰時爆咗句「你唔係Peter Parker」，以及「奇異博士」指幾位歹角命定因「蜘蛛俠」對戰而死，既然「八爪魚博士」唔認Tom Holland版做Peter Parker，又暗示得蜘蛛俠可以對付佢咃……真係得Tom Holland一個蜘蛛俠對5個？
網上亦有唔少眼利粉絲指棚架同「沙人」對戰一幕，根據背後蜘蛛Logo認為片中人係「二代」Andrew Garfield而唔係Tom，不過筆者比較關心第三代蜘蛛仔女神MJ（Zendeya飾）下場，因為有睇開「蜘蛛俠」都知《蜘蛛俠2：決戰電魔》中Gwen Stacy由高處墜下，任憑Andew Garfield嘅蜘蛛俠幾努力都救唔返……千祈唔好咁對MJ呀！
更多電影文章
電影LOL︳今期睇咩戲 梅艷芳／長津湖／東京貴族女子／藍色恐懼
電影LOL︳Disney+狂炒冷飯 Amy Adams再演天真嬌俏公主 湯漢斯演新版《木偶奇偶記》
電影LOL︳Disney+節目晒冷 大量Marvel角色單飛拍劇集
電影LOL︳觀眾陰影太大？ One Piece拍真人版 造型照曝光已經有負評
電影LOL︳BL劇《只因我們天生一對》電影版 12月香港上映
電影LOL︳神奇女俠Gal Gadot演《白雪公主》魔后 網友大呼選角錯晒！
電影LOL︳新一代邦女郎安娜迪艾瑪絲變影壇搶手貨 傳接拍殺神John Wick外傳
按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載
