37歲馬賽出PO最新動向 內地客串一日戲份便失業
現年37歲嘅馬賽（現名馬菀迎）喺2008年參選港姐獲得季軍及最上鏡小姐，入行後備受TVB力捧，不過喺捲入桃色醜聞及艷舞片風波後，形象直插谷底，之後佢離巢TVB轉戰內地發展。喺2019年馬賽與圈外男友結婚並誕下囡囡Camellia，淡出幕前專注照顧家庭。近年佢活躍於社交網站，不時與網民分享親子日常及美容心得，近日佢就喺小紅書上載一段前往內地惠州拍戲嘅短片，表示自己有工作，不過客串一日又失業。
馬賽喺小紅書上載一段前往內地惠州拍戲嘅短片，留言寫上：「終於有工作了…then又失業了。因緣和合、聚散無常，才是生命的主旋律，隨波逐流、順其自然、順勢而為才能與無常共舞。無為而對治生活，以上，看得懂的看得懂嗎？感恩每一天、當下即一切」。影片中嘅馬賽搭車前往惠州電視台，期間按摩臉消腫及梳頭做頭部保養，佢到達拍攝現場便品嚐演員餐，拍攝12小時後放工，雖然只係客串一日，不過仍獲劇組贈送大束玫瑰花，並話：「沒有想到來客串朋友的戲，一天還收到花，太貼心了！祝我們的《年少有為》早日上映！大賣大賣！」去到影片尾段，馬賽喺凌晨兩點半返到屋企，佢就問囡囡「你說媽媽去工作有這個花好嗎？」，之後囡囡答有花特別好，不過就撒嬌話唔俾媽媽去拍戲。
影片出街後，唔少網民大讚馬賽保養得宜，例如「真靚女」、「還是這麼漂亮」、「依然咁靓」、「賽賽，有點想念你了，會回TVB拍劇嗎？」、「期待賽姐新戲」、「好正啊，仲係咁索」及「看著你的戲一起成長～希望你越來越好喔」。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
