Bob林盛斌三女多才多藝 藝術體操比賽曾排尾三 4年後奪全港冠軍

林盛斌（Bob）與老婆黃乙頤（Pearl）於2007年結婚，育有3女1子，包括大女林霏兒、二女林熹兒、三女林機兒及孻仔林道申，一家六口幸福美滿。林盛斌出名顧家，黃乙頤則出名親力親為教小朋友，身邊唔少朋友都會向佢取經，曾分享指家長一定要緊守自己原則、高壓式講道理，又要毫不吝嗇地疼錫孩子先可以管教到佢哋。黃乙頤採取嘅育兒方法令4名兒女都非常聽話，被封「小周迅」嘅三女機兒更加才藝多多。

林盛斌和黃乙頤三女機兒能文能舞，曾於去年到比利時參加鋼琴及豎琴比賽勇奪冠軍，更加係體操高手；機兒由五六歲開始學藝術體操，2021年參加藝術體操比賽，今年初與家姐林熹兒為花車巡遊表演。日前，黃乙頤於社交平台分享三女機兒企喺頒獎台奪得「2025年全港藝術體操分齡比賽」冠軍嘅照片，表示四年前女兒第一次參加公開比賽排名尾三，四年後攞冠軍，大讚女兒叻女：「由21/23 到1/38，中間經歷了1460天，因為爸爸挑戰媽咪，問個女攞第一，係幾多個人裏面嘅第一？所以我決定出一個post，紀念一下！尤記得佢第一次出公開比賽，23個人裏面，佢排第21 ，當日佢問我，我係咪做得好差？我話俾佢聽，排名只係表示你今日喺呢一班人裏面嘅表現排位，並不代表你個人質素。況且我哋係第一次比賽，慢慢努力，享受比賽，肯付出，總會有收穫。 四年後的今天，佢喺38個人裏面攞冠軍，對佢係一個好大嘅肯定，而佢第一句同我講都係好開心自己有付出有收穫。不是所有的堅持都有結果，但總有一些堅持，能從冰封的土地裡，培育出十萬朵怒放的梅花。」除咗楊潮凱留言激讚：「好叻呀周迅」，亦有唔少網民恭喜三女機兒：「叻女。Bob爺一定開心到跳起」、「媽媽想必比女兒還高興呢！見到都感動」、「Proud of her」、「繼續努力」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！