【電影LOL】《22世紀殺人網絡 復活次元》玩紅藍藥丸橋段 chok出18萬款電影片段!

期待已久嘅《22世紀殺人網絡 復活次元》籌備多時,今個星期四將會推出首條預告片!系列事隔18年重啟第4集,繼續由主腦Lana Wachowski執導,奇洛李維斯當然係演出”The One” Neo一角,Carrie-Anne Moss亦會回歸飾演Trinity。

有關電影嘅傳聞好多,包括《復活次元》可能係前傳故事,故事大綱至今仲未公佈極度神祕。套戲嘅宣傳噱頭十足,連出條預告片都大賣關子,推出官方網站whatisthematrix.com大玩《22世紀殺人網絡》經典藍紅藥丸橋段!

網站首頁有藍紅藥丸,唔同時間點選唔同藥丸會出現不同嘅電影片段,據聞一共有18萬個版本,因為次次組合唔同,令人忍唔住狂㩒睇片!暫時片段見唔到傳聞會加盟嘅《黑豹》男星Michael B. Jordan,反而見到《糖魔怪客》男星Yahya Abdul-Mateen先係對鏡凝望,又有佢進入液態鏡中以及同機械對戰嘅片段,有傳佢嘅角色同Morpheus有好大關係!

其他片段包括飾演奸角嘅Jonathan Groff被封嘴,Trinity重現佢經典牆上跑以及幾個槍撃慢鏡頭等,男主角奇洛李維斯嘅場面分別有佢邊騎電單車邊打鬥、又有佢被圍毆以及擺出打功夫嘅姿勢等,玩返系列首幾集嘅經典場面。戲中奇哥著乾濕褸、留中長髮嘅造型,似足《殺神John Wick》,一個look拍2套戲只有奇哥先得。

另外公佈嘅主演有飾演心理醫生嘅Neil Patrick Harris、飾演Niobe嘅Jade Pinkett Smith、《愛登士家庭》、《真愛之吻》Christina Ricci及《權力遊戲》女星Jessica Henwick等。

《22世紀殺人網絡 復活次元》能否延續系列傳奇定淪為炒冷飯回憶殺,今個聖誕自有分曉。

更多電影文章

【電影LOL】今期睇咩戲 尚氣/危樓深淵/惡煞

【電影LOL】宮崎駿又退休唔成做企畫 吉卜力首套全電腦動畫《安雅與魔女》

【電影LOL】導演爆《水行俠2》變恐怖片 Jason Momoa造型由巨型栗米變暗綠龍王

【電影LOL】Daniel Craig最後一戰!《007 : 生死有時》上畫前夕 片商推紀錄片造勢

【電影LOL】《尚氣》唔夠人氣 迪士尼搵梁朝偉狂做訪問谷戲

【電影LOL】打鬥連場 係咪虐老?75歲史泰龍拍《轟天猛將》外傳

【電影LOL】Netflix9月搞節目巡禮Tudum 3個鐘頭巨星放題新劇片段任睇

【電影LOL】戴妃電影Spencer預告曝光 幾個鏡頭交待皇室華麗背後實況?

【電影LOL】高先嘉禾經典電影重溫活動 睇奇洛李維斯張孝全青澀舊片

按此下載 Yahoo APP 9月免費送一萬個蛋撻王Q嘜蛋撻,仲有貓山王榴蓮冰皮月餅/鳳梨奶黃月餅同你賀中秋,立即下載!