三命︳陳佩思演媽媽引觀眾注目 入行浮沉20年迎來突破 創業做榴槤皇后仲開埋餐廳

由杜琪峯嘅銀河映像同MakerVille合拍劇集《三命》本周開播，以極富電影感手法拍攝，令觀眾耳目一新。故事以主角駱澤信嘅命運為主軸，劇中駱澤信媽媽林寶燕喺第一集第一場戲就出場，成集都有唔少需要細緻演繹嘅場口，飾演林寶燕嘅原來係前TVB藝員陳佩思(Pancy)。

即使係TVB忠實觀眾都未必認得Pancy，畢竟佢喺大台嘅發展未算突出。現年40歲嘅陳佩思係TVB第18期藝員訓練班出身，同屆仲有胡定欣、黎諾懿、鄭俊弘等。Pancy之後被派去主持兒童節目，亦不時參演劇集，但多數係閒角，佢甚至喺2012年TVB大裁員時被叮走。2年後陳佩思轉投香港電視，演出機會終於多咗，但由於不獲發牌而未有進一步發展。陳佩思星運麻麻之餘都有唔少黑仔事，試過捲入直銷公司騙案損失6位數字，甚至有傳佢拍電影《常在你左右》一場仰藥自盡戲份時誤服真藥物而被送入ICU。

後來陳佩思機緣巧合之下為杜琪峯執導嘅《三人行》客串護士角色，從而受賞識，其後都有參演銀河映像作品如《七人樂隊》、《命案》等。《三命》更加係陳佩思最多戲份嘅演出，佢喺IG更形容角色「從20歲演到60歲，今次算是演藝生涯最有挑戰的一次」。

演戲之外，陳佩思仲有經營生意，甚至成為佢主要收入來源。Pancy開過時裝店同零食店，後來因為拍咗個榴槤廣告而認識馬來西亞出口商，再進而發展成賣貓山王榴槤嘅零售批發生意。陳佩思2年前前往著名嘅藍帶廚藝學校泰國曼谷分校入讀9個月課程，而家仲同朋友合資開餐廳！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！