魯振順怒爆公司山頭文化 斥「幕後紙上談兵嗰啲幾百萬一年」
本月22日生日後將踏入68歲的魯振順，日前趁與TVB主席許濤與近百名藝員見面時，無所畏懼地講足10分鐘，訴說公司不時Cut Show導致收入大減，又代表一眾演員說出訴求，稱希望可以得到公平及應有的對待。惟TVB總經理曾志偉卻以「唔係特別嘅新聞」、「冇一個藝人可以做到老」作回應，稱電視台政策向來如此。
由於魯振順快將約滿，其言論及公司反應令人關注他的未來去向，但他依然暢所欲言，接受YouTube頻道「小鴻吹水站」訪問，與台主楊紹鴻對談時繼續大爆怨氣，直指公司有山頭文化，「而家好在仲有合拍劇，仲有啲味道出嚟睇下。再咁固步自封嘅話，用嚟去都自己幾個人，八點又見佢，九點都係嗰幾個人，嗰幾個仲叻，仲喺化妝間呻『哎吔，好辛苦啊』。好多人又話TVB唔夠人用，好多人坐喺度唔用，因為山頭文化，我唔係你嘅人，我唔用吖嘛」。
魯振順怒斥山頭文化令同事工作量不平衡，「同你有關係、有交流嘅你就咁用」，即有人忙到不停做到死爆騷，但有人卻無工開要不停還騷，認為高層應該要平衡一下：「畀嘗試吖嘛，好多新人都係嘗試，你唔好同我講呢啲角色唔啱我做，大佬，我撈咁耐，我話我唔啱做，我話你呀，「唔啱你自己做嘞，唔該返屋企啦』。有咩理由話唔啱？係你畀唔畀我做，你畀你啲人去嘗試，點解唔畀我試？因為我唔係你嘅人？」
魯振順更指公司「應慳唔慳」，矛頭更疑似指向公司管理層，「如果慳嘅，後面幕後紙上談兵嗰啲幾百萬一年，減！講咁多嘢，叫佢落嚟睇，去現場受下，嗰氣氛、個氛圍，點樣做法、點去製作，唔係靠把口去講講講」。他指許多人也看出公司的策略慢人一步，但卻不敢直言，「講完之後冇得做添」，但他現在已不怕，「咁而家點解（敢言），咪就倚老賣老咯，我話冇得做咪冇得做咯，你估真係得你一間咩？而家好多人走咪咁意思咯，唔好以為得你自己一間」。對於電視台要蝕錢，主持人稱「抵死」，而魯振順亦表示同意，「係自己攞嚟嘅，自己種落幅田度，自己受囉」。
