李修賢爆王傑童年時屢遭家暴 移居加拿大出入賭場「輸咗好多錢」

八九十年代拍過唔少警匪片嘅李修賢，近年同唔少資深娛圈人一樣開設網上頻道拍片爆料，最近佢喺一條片段提及歌手王傑，並指對方因賭博而損失唔少，但李修賢呢番言論就惹來唔少王傑fans非議。

王傑父親係六七十年代影星王俠，李修賢喺片中指自己1971年住喺邵氏清水灣片廠宿舍，王俠同王傑父子都住喺嗰度，當年王傑只有10歲，所以對王傑嘅印象都係童年片段。李修賢指王傑細個「好淒涼」，因為脾氣唔好嘅王俠不時對兒子施以家暴。李修賢同童年王傑不時一齊遊山玩水，去海邊捉螺食。李修賢又大爆王傑13、14歲時，間唔中會偷偷揸走李嘅電單車。

李修賢話八十年代初邵氏電影減產，王傑返回台灣，並成為當紅歌手。但李修賢又指從家人口中得知，王傑於90年代末移民溫哥華後不時出入賭場，更指他「輸咗好多錢」。李修賢喺片尾感嘆「人生真係過得好快，睇住呢個細路（王傑）起起跌跌，到而家佢都過60啦」。不過據知呢條片令到唔少王傑歌迷不滿，認為出入賭場之說未經證實。

翻查資料，72歲嘅李修賢同王傑原來年紀只差十歲，修哥住喺邵氏宿舍時剛入行冇耐，難怪會以大哥哥身份同童年時嘅王傑一齊玩。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！