李佳芯離巢TVB後自組工作室接Job 與黎諾懿繼《BB來了》再合作拍新劇
李佳芯（Ali）過往幾年傳被內地封殺及因與TVB傾談續約未有進展，令工作量大減。屢傳離巢後，李佳芯喺今年初承認已正式與TVB結束12年賓主關係，最後一套喺TVB拍嘅劇係《麻雀樂團》，不過尚未播出，而回復自由身嘅李佳芯喺上個月宣布自組工作室接Job，並正與唔同公司接洽談論工作事宜，又透露已有去唔同嘅Casting。然而，近日又有李佳芯嘅新動向，原來佢將與黎諾懿合作拍劇，亦係二人繼TVB劇集《BB來了》後再次合作。
《BB來了》當年叫好叫座，李佳芯憑飾演新手媽媽「唐恬兒」一角勇奪「最佳女主角」獎項；李佳芯和黎諾懿更因此劇成為好朋友，黎諾懿分別喺2022年及2023年邀請李佳芯到自己主持嘅節目《仨心友行3》和《隨懿深度行》做嘉賓。對於有傳因為李佳芯被飛出《BB來了》續集，連累黎諾懿齊齊遭易角，改由馬國明與岑麗香頂上嘅講法，黎諾懿當時坦言未能與李佳芯合作感到可惜，但表示冇話拖唔拖累，指自己一定會同李佳芯再合作。終於，日前喺馬來西亞「Astro 2025年節目強勢來襲」中公布李佳芯將與黎諾懿合作拍攝新劇《義和》；據當地媒體介紹，劇集講述小鎮黑幫喺老大過世後，內部權力洗牌嘅權謀風雲，演員包括馬來西亞、新加坡及香港演員。黎諾懿向媒體透露，現階段正在度期，希望可以快啲對外公布消息。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
