伍仲衡再提簽洪心怡過程 預咗唔簽約冇乜曝光機會 明言曾擔心TVB捧人方式
《中年好聲音》評審伍仲衡近排簽咗《校園好聲音－唱響中國》比賽冠軍洪心怡，有傳TVB因為不滿被伍仲衡截糊，立即將伍飛出《中年好聲音》評審行列。伍仲衡事後曾解釋同TVB喺簽洪心怡之前有溝通，而且洪心怡亦表示自己推卻TVB，TVB則發聲明指「尊重每一位合作夥伴的職業決策」，又強調「在專業和成熟的框架下共同努力，加速推動香港樂壇的多元化發展」。
伍仲衡最近接受TVB前高層陳志雲嘅直播網上訪問，仲帶埋洪心怡見人。訪問中，伍仲衡再次覆述事件，話當日為《校園好聲音》做評判，俾評語已經話「簽得呀呢個」，並且約對方試音同做直播，形容洪好似當年佢同王菀之一樣咁合拍。
伍仲衡太太Ida本身做藝人管理，於是伍俾TVB一個高層嘅電話由Ida接洽，商討以共同管理形式合作培育洪心怡。伍仲衡認為TVB好多藝人本身都係其他公司藝人，一樣可以拍劇，認為問題不大。Ida同TVB傾完之後，伍仲衡話雙方結論係再傾，但對方已經冇feedback。
而洪心怡就同伍仲衡有聯絡，甚至告知伍TVB俾份約佢。伍仲衡直言當時個心沉一沉，而且對於洪可能簽TVB覺得擔心，「TVB有佢哋方針，點樣捧一個人，我有擔心」。後來伍仲衡知道洪心怡婉拒TVB，先至開始傾合約。Ida曾經提醒伍仲衡，簽下洪心怡可能令TVB唔高興，最壞情況係冇得再上《中年好聲音》。不過伍認為「我本身主要嘅工作係做音樂，我上TVB綜藝只係呢幾年叫做行前咗少少。人哋問我職業係咩，我唔會講我係一個演員……我係一個音樂人，我係做幕後作曲監製，呢個先係我first priority，如果你畀我揀，我都會揀簽心怡。」
陳志雲問伍仲衡點同TVB修補關係，伍話同TVB冇嘢，陳就話「真係有條刺」，伍就反問「條刺喺我度？」。而心怡將會好大機會冇得現身TVB，伍仲衡就話「我諗佢自己唔簽TVB，都應該喺TVB曝光嘅機會都冇乜」。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
