《千祈唔好同人比較幸福》

人類總係害怕人哋將自己同別人比較，但其實心裡又喜歡暗暗同人比較嘅生物。阿媽最愛將你同隔離屋陳太個仔比較，細個比成續，大個比人工。而你自己呢？就會唔小心喺心裡同朋友比較幸福，聽到Mary個男朋友送咗一卡鑽石畀佢，又聽到Betty個男朋友管接管送有幾好⋯⋯然後突然覺得自己身邊嗰個點解咩都無做？過時過節點解都無驚喜？

朋友拍拖多年，今年分咗手，所以情人節決定請假唔返工。因為每年情人節公司嘅年輕女子都會收花收禮物，全公司一片幸福粉紅，而我朋友實在太恐懼呢種「人有我無」嘅失落感。

比較，真係一樣會令人不幸嘅東西。

有好多嘢我哋本來其實唔需要，只係突然見到人哋做咗人哋擁有先產生慾望。喺聽到朋友講自己生日收咗一卡鑽石之前，都好滿足於男朋友送嘅小禮物，只係比較完先突然覺得人哋幸福啲啫。

總係嚮往住別人Facebook show畀你睇嘅幸福，其實最蠢。因為大家都喜歡放大自己嘅幸福，你估個個真實生活都係咁浪漫滿屋咩？我會勸你如果真係要比較，就拎哂所有嘢去比較，唔好淨係拎人哋男朋友嘅一個優點去推翻自己男朋友嘅其他優點。情人節都無謂比較花嘅大細，餐廳嘅平貴了，為咗比較就去苛索男朋友嘅行為，太港女了～

幸唔幸福嘅嘢，不嬲都係如人飲水，冷暖自知㗎啫！