張慧儀嬲爆回應遭影射劈腿6富豪意外懷孕：好好笑咩呢啲嘢？

鄧兆尊喺今年1月於網上娛樂節目《娛樂好好玩》擔任嘉賓主持，期間爆料指某女星曾同時與6個富豪交往，後來更意外懷孕，但富豪們都冇承認責任，只係各自俾100萬了事。呢個言論一出，隨即引起一班網民猜測女星身分，而有一個養子嘅張慧儀亦成為嫌疑人物之一。

鍾慧冰YouTube頻道節目《冰姐的花樣人生》最新一集（26日）搵嚟張慧儀擔任嘉賓，訪問片段一開始播出精華片段，鍾慧冰問：「知道有個女星以前就好犀利嘅，一次過識咗六個富豪，就將個矛頭指向你喎？」，而張慧儀就嬲爆爆回應：「有某人就攞咗一張合照，粉絲就開始問，我哋好想問阿鄧某某嗰個女星係邊個，佢就喺度寫張慧儀。嗰一下，我係非常之嬲﹗嚴重警告，跟住兩個紅色感嘆號。不要再製造謠言！大家有冇諗過，對嗰個小朋友係有幾大嘅影響！你好好玩咩？好好笑咩呢啲嘢？」不過喺噚晚播出嘅《冰姐的花樣人生》中，整條訪問便都冇再提及富豪產子一事，唔少網民都估計仲有下集。

喺訪問中，張慧儀首先講及自己嘅入行經過，自小有演藝夢嘅佢，喺1993年代表馬來西亞保來港參選國際華裔小姐，其後與TVB簽約成為旗下藝人，極速加入《開心華之里》劇組，之後憑《真情》飾演彩瑤一角成功獲得觀眾關注。另外，佢仲講到最大嘅適應期係由於自己性格率直又單純，但佢嘅外型惹火，熱帶地方長大嘅佢鍾意著短裙同短褲，所以有啲同事會用一啲唔好嘅字眼去形容佢。

另外，鍾慧冰亦有問到當年與盧慶輝拍拖一事，張慧儀就話拍《真情》時二人戲內係冇交雜，喺未有感覺時有人話「盧慶輝都幾靚仔喎」及「你會唔會同佢拍拖」，當時張慧儀就回答話「靚仔咩」及「我一定唔會同佢拍拖」，之後佢就話：「唔知點解，某年某月某日突然間，一下『叮』一聲就着咗啦」，所以佢都慨嘆感情事係好奇怪。

可惜張慧儀及盧慶輝嘅戀情只係維持咗一年，而佢就話當時係「被分手」，所以對佢嘅打擊係好大。當時係盧慶輝喺出席活動時單方面向傳媒表示二人已分手，不過張慧儀係不知情，仲話前一晚仲食緊飯，未有分手。張慧儀指盧慶輝現已有家室，而佢哋亦好多年冇聯絡，所以當年情變內情就唔想透露，唔想影響他人。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！