鄭俊弘談及天使綜合症兒子最新病情 透露囝囝成功講出人生第一個字：好感動㗎

何雁詩（Stephanie）和鄭俊弘（Fred）於2020年結婚，兩年後誕下兒子鄭讚廷（Asher），不過其兒子發展進度比其他同齡孩子慢，最後1歲半時經專家評估確診患上罕見遺傳病「天使綜合症」。雖然二人曾陷入痛苦迷茫之中，但最終選擇勇敢面對，積極了解更多該病嘅資訊及接觸相關團體，並喺上年年尾與兒子遠赴美國接受為期3星期嘅密集治療，Asher有明顯進步及改善。日前鄭俊弘接受YouTube頻道「One Night Talk」嘅《乜Cult都傾》專訪，期間透露Asher嘅最新情況。

日前鄭俊弘接受《乜Cult都傾》訪問，期間除咗講到自己嘅近況及今次返溫哥華嘅原因之外，亦有透露囝囝嘅最新情況：「佢行路有困難，佢未識行路，亦未企得到，但佢而家扶住就可以企喺到㗎啦，呢啲小朋友就會有腦抽筋，所以都要keep住食藥去控制個腦抽筋呢個情況」。

之後主持人問與囝囝相處過程，有啲乜嘢令佢最開心時，鄭俊弘就話：「係好感動㗎，我哋其實少少嘅進步已經係開香檳㗎喇！因為上個禮拜我同佢去做治療，咁佢講咗佢第一個字（係咪爸爸？）唔係，佢同治療師玩泥膠，咁個治療師就塞咗啲嘢入去叫佢掹出嚟，Asher你掹出嚟啦，咁佢真係掹到，之後佢獲讚好叻，佢就講咗『叻』，佢係好有信心，唔知點解把聲係低嘅，雖然錄唔到，但我係好開心聽到有呢隻字，希望佢可以再develop多啲。」

另外，主持人仲提及鄭俊弘教囝囝音樂，佢就高興表示：「佢好鍾意鋼琴㗎，唯獨鋼琴可以hold到佢嘅focus好耐，好明顯佢係好鍾意音樂，所以我每日都會同佢一齊彈音樂，日日同佢培養彈音樂」，而仔仔每個星期都會上音樂治療班，亦係佢最鍾意嘅班，而最憎嘅就係物理治療班。

節目播出後，唔少網民紛紛留言大讚Asher叻仔，例如「Asher 好叻叻！一家人要加油呀！」、「贊廷真係好叻仔，加油」、「好開心聽到Asher有進步」及「仔仔叻叻」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！