鄭丹瑞大女鄭瑤出嫁 女婿獲封「翻版黎明」超強背景曝光

金牌司儀「旦哥」鄭丹瑞喺上年9月正式榮升外父，其大女鄭瑤（Zaneta）與金融才俊男友Jacob Chan註冊結婚，場面感動。去到前日（27日）鄭瑤再喺IG限時動態轉發斟茶儀式、喺教堂進行註冊儀式及擺酒等多條片段及多張照片。

從照片及片段所見，鄭瑤興奮得不時大笑及手舞足蹈，反而Jacob就相對淡定。鄭瑤喺早上著上龍鳳褂，手上戴有兩對龍鳳鈪，而頸上則掛上三對龍鳳褂。另外，其他片段亦見到旦哥喺教堂拖著鄭瑤進場，將女兒交畀Jacob，場面非常溫馨。之後，一對新人坐上勞斯萊斯花車離開。去到夜晚，佢哋喺酒店擺酒，鄭瑤換上婚紗，期間仲不停向親友飛吻。

有指鄭瑤和Jacob喺東京認識，佢哋喺同一時間及地點出席唔同嘅商務晚宴，發現大家都係香港人，所以就傾起上嚟，更因喜歡睇書及睇畫而結緣。

精通中英德法文四國語言嘅鄭瑤，喺英國中學會考考獲11A優異成績，先到美國修讀英國文學及政治學，之後再到英國修讀莎士比亞歷史系碩士，現時任職時尚編輯，需要不時四圍飛。至於Jacob嘅背景亦唔簡單，高大靚仔嘅佢有「翻版黎明」之稱，畢業於劍橋工程系，之後再喺哈佛修讀MBA，兩年前返香港打理家族辦公室生意，絕對係一名「筍盤」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！