戶戶送撤港｜外賣員指3平台酬勞參差 KeeTa低見17元 憂缺競爭加劇剝削｜Yahoo

【Yahoo 新聞報道】戶戶送Deliveroo宣佈撤出香港市場，本港外賣平台僅餘Foodpanda與KeeTa兩大巨頭。面對戶戶送撤出香港，有外賣員擔心待遇會進一步被剝削，「畢竟三個外賣平台入面，單價比較好係Deliveroo」，戶戶送外賣員上線條件亦相對較為自由，現時只好考慮轉往Foodpanda接單。至於KeeTa在外賣員圈子風評較遜，開出的「單價」酬勞低見17元，「接受唔到送一單連廿蚊都無」。

擔任戶戶送步兵（步行送餐外賣員）的阿Man接受《Yahoo新聞》訪問時指，最初登記成為戶戶送外賣員，因發現其單價較高，上班時間亦較為自由，「喺facebook外賣員群組成日見到啲師兄討論，佢哋都會話袋（意指袋鼠，戶戶送暱稱）價高啲」。

阿Man本身另有正職，戶戶送外賣員能夠隨時彈性上線接單，也是他考慮的因素之一，「食完飯上一上線又得，約咗人早咗到又可以上一上線等單」，每個月「得閒做吓」也可賺約2000元收入，每單酬勞平均30多元，「有次落微微雨可能無咩人開工，試過送遠少少單價去到77.3蚊，計埋八成接單率加乘，嗰單有100.49蚊」。他又指Foodpanda則無法自由上線接單，因此他未有考慮，「Foodpanda要提前預約時段，有啲難預」。KeeTa供自由上線外賣員的單量則較少。

戶戶送外賣員自由上線 接單率達八成酬勞可加乘

阿Man續指戶戶送設酬勞加乘，如外賣員的接單率滿八成，週薪可乘1.3倍。不過若接單率低，失去加乘後的單價亦非吸引，八成門檻亦不算低，「踢幾單已經跌穿八成，有幾次我接單率喺81%至83%左右，就會接到送好遠、至少行15分鐘嘅單，甚至跨區單，唔知咁啱定系統派，想有獎金就唯有硬食」。

KeeTa單價較低但設準時獎：搞到外賣仔喺條街跑來跑去

任步兵三個月的阿Man指，曾經對加入KeeTa步兵有興趣，但觀察行家的討論後發現，KeeTa步兵薪金單價近期下降，「有師兄出post三開（同時上線三間外賣平台），戶戶送同panda都有60幾蚊，但KeeTa就得50幾」。他更見過有行家貼出KeeTa送餐酬勞只有17.05元的訂單，「連埋準時獎先加一蚊，接受唔到送一單連廿蚊都無」。據他了解，KeeTa的準時獎約1元至10元不等，故他送餐時經常「見到KeeTa師兄喺條街度跑」，「單價本身低，搞到外賣仔為咗拎到準時獎喺條街跑來跑去，係咪對員工好嘅安排？」他擔心戶戶送撤出後，情況會變本加厲，「食客覺得某個平台平、某個平台貴，其實都某程度上反映咗外賣員待遇」。

外賣車手感可惜：少個平台少咗選擇

同時任三個平台兼職車手六年的外賣員阿豐（化名）對戶戶送撤出香港感到可惜，「車手群組有好多人都話覺得好可惜，少咗一個平台代表少咗一個選擇，戶戶送同KeeTa係有得自由上線，相反panda必須報到更才有機會有單做，KeeTa自由上線嘅單量一般都比報更嘅車手少」。至於三個平台的單價，據阿豐觀察則視乎不同區域而定，KeeTa會在北區有較高單價，但屯門則是戶戶送單價較高，而戶戶送愈長程的單就相對有較高單價。

對於戶戶送沒落的原因，不少網民歸咎送餐較慢。阿豐則認為，由於Foodpanda及KeeTa均有預定送遞時間，而KeeTa更會因逾時沒收準時獎金，故車手亦要「飛車送餐」，「冇咗準時獎，（單價）都真係會低過袋鼠」，「送外賣啲人都會比平時揸快咗，尤其是KeeTa要追準時獎」，故除非戶戶送送餐地點較近，否則車手亦會優先派送KeeTa或Foodpanda的訂單。

Foodpanda遲送不扣酬勞但發警告

阿豐續指，Foodpanda雖然不會因遲送單而扣單價錢，但會不斷向車手發出警告，要求車手盡快取餐或盡快送餐，「佢哋口號上係叫大家小心送遞，其實都幾矛盾」。KeeTa亦有推出不同獎勵機制歡迎車手接單，「每星期有唔同嘅門檻，完成一個又一個嘅門檻就會有多啲獎金」，而每星期又根據上星期車手表現調整，「嗰個禮拜做到十張，可能下星期又會叫你做多一兩張，咁樣慢慢逼你、鼓勵你做多啲」，最終車手亦會選擇先在多單的平台接單，對不少車手來說，「袋鼠（戶戶送）係用嚟喺其他嗰兩個中間攝時間」。

對於戶戶送撤走，阿豐指不太擔心收入來源受太大影響，「由於香港會叫外賣嘅人，來來去去都係嗰班人，所以單量都係睇吓分咗去邊個外賣平台度，車手開晒幾個平台，就係睇下邊個台派到單就做邊個」。

對於單價懸殊及準時獎問題，《Yahoo新聞》正向Keeta查詢。