方皓玟遭麥美恩拒絕做朋友邀請 感謝對方請食檸檬：你真係唔駛驚喎

方皓玟近年身形暴瘦變成「紙片人」，惹來厭食症疑雲。早前，方皓玟發現麥美恩於Threads出Post，寫道：「風都/吹得起/食多/啲嘢啦/唔/該」，質疑對方影射自己，仲叫麥美恩如果係講緊佢，會親自回應，唔使喺Threads講，點知嚇到麥美恩及時澄清，指自己所指嘅唔係方皓玟，而係鄺玲玲︰「唔係啊，唔係啊，唔係你啊，我已經5G衝浪回覆Cam Man哥哥，多謝你幫我解釋返」，方皓玟亦有主動留言，表示想認識麥美恩：「做個friend可以？」，麥美恩則回應指自己怕羞。

麥美恩接受媒體訪問表示對於方皓玟邀請做朋友一事，指自己係有拒絕佢，因為怕醜，又被嚇親，唔知點反應，認為對方唔需要道歉，並感謝方皓玟邀請做朋友，自認表面熱情，但其實內心相當膽小。昨日（17日），方皓玟喺IG出Post，叫麥美恩唔駛驚同唔駛太認真：「有記者朋友send咗麥美恩嘅訪問俾我， @mayannem Mayanne 其實你真係唔駛驚喎，我睇到依家仲驚過你呀，邀請你做朋友好明顯係講笑㗎咋，傻豬唔好咁認真啦，只係當日Cam man哥哥遞咗你個threads post俾我，我即時貪玩留咗個言，事後基於禮貌所以邀請你做朋友，唔駛驚唔駛驚，我唔怕食檸檬㗎，做人唔使太認真嘅。做朋友都要講緣份嘅。」

唔少網民就留言表示自己好想同方皓玟做朋友：「我唔驚同你做朋友呀，可唔可以同我做朋友呀？」、「以為mayanne好聰明，點知喺呢件事上處理手法咁low」、「佢損失喎，我都想申請同Charmaine交個朋友」、「排隊同小明做朋友」、「申請做朋友。個驚字太多筆劃唔識寫」、「有興趣做朋友 請DM」等等。方皓玟又留言指經過呢次，發現自己食檸檬嘅能力好勁：「今次都真係好多謝 @mayannem 啊，我平時都好少主動識朋友嘅，今次佢嘅回覆都令我人生上咗重要嘅一課。我明白到自己食檸檬嘅能力原來係強過蔡辛強㗎，同埋以後提出識人真係要帶眼識人啊。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！