林峯新廣告「飛鷹出爪」動作引關注 媲美大阪地標「固力果跑跑人」? 網民：值得申請盛事基金

林峯今年憑電影《九龍城寨之圍城》陳洛軍一角人氣急升，工作不斷，近日仲與胡子同及阿正拍攝活絡油品牌電視廣告，而佢嘅廣告仲刊登喺尖沙咀天星小輪附近嘅超巨型廣告牌上，有網民更指廣告照可以同大阪心齋橋道頓堀地標「固力果跑跑人」媲美。

近日林峯與胡子同及阿正拍攝活絡油品牌電視廣告，廣告除咗充滿「城寨」感覺之外，仲有精彩嘅武打場面，而戴上黑超嘅林峯更做出雙手舉高及單腳站立嘅「飛鷹出爪」動作，身後係一對熊熊烈火嘅大翅膀。

除咗呢個電視廣告引起關注之外，喺尖沙咀天星小輪附近嘅超巨型廣告牌同樣備受矚目。林峯同樣做出雙手舉高及單腳站立嘅動作，雖然該廣告被網民指老土，但就認為可以同大阪心齋橋道頓堀知名景點「固力果跑跑人」媲美，可以做遊客打卡位：「唔係個個carry到」、「第一眼睇我都心諗做咩，但其實配合返品牌本身形象其實又覺得好合理」、「樂壇欠林峯一個膠袋」、「又多個遊客打卡位」及「我覺得林峯呢塊板 直頭值得申請盛事基金 令香港變成心齋橋咁熱鬧」等等，同時亦有網民認為陳展鵬比林峯更適合做代言人：「林峯非常好，但總覺得陳展鵬更合適」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！