港女又萬歲｜《愛·回家》小花被爆做飯局妹 揭富豪揀女準則
曾經於ViuTV節目《戀講嘢》承認出席飯局，甚至做過一次收費十萬道德交易嘅「飯局妹」Charlene日前被田蕊妮邀請擔任網台節目《港女又萬歲》嘉賓，分享香港「飯局妹」嘅條件，更大爆有KOL、入過港姐初選、疑似《愛·回家》女藝人都當「飯局妹」。
Charlene分享指要成為「飯局妹」首先要樣同身材都要過關，而過往疫情期間就比較寬鬆，透露只要35歲以下有眼耳口鼻嘅女仔都會被叫去食飯；田蕊妮問及Charlene係咪喺寬鬆條件嘅情況下入行，佢就坦承：「我都承認自己樣同身材都唔係特別標青，好多有錢人唔鍾意大X，鍾意平凡嘅身材。」 又指，香港飯局一般3個鐘起，自己過往曾有過搏殺嘅時期，即使凌晨4、5點嘅飯局都會應約。
Charlene宜家仲做埋飯局中介，於IG自介除咗形容自己係專業人士及紅唔起嘅KOL，更表示自己可幫男士介紹潛在拍拖對象：「6年紅娘經驗，幫男人搵女朋友，100+成功case」，田蕊妮問及Charlene有無見過藝人做飯局妹，Charlene直言旗下「飯局妹」中就有藝人：「KOL，入過初選、上過新聞啲落選港姐我都有幾個。有個比較紅啲，入到決賽，上過八點檔。」田蕊妮續追問八點檔係咪指處境劇，Charlene回應：「係」，節目雖以消音處理，但仍可聽得出係指《愛·回家》；表示較紅嘅藝人係海鮮價：「如果想多Job就兩萬蚊之內，有啲Artist嗌到五、六萬就難啲搵客。」佢自己就會從中抽成5千至1萬。對於客人揀女準則，Charlene表示會有啲客唔想要素人但又想要有少少名氣嘅時候，上過一、兩次新聞嘅「飯局妹」就較有巿場。至於有無富豪指明要醜女，Charlene表示有試過SD一大堆相畀對方揀女，但對方下意識選最醜樣嘅一個。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
