Yoyo葛綽瑤撞樣豬仔錢罌 公開回應被激讚玩得：不紅天地不容
ViuTV劇集《無用的謊言》踏入結局篇，並即將本周五（17日）迎來大結局，是次為女主角葛綽瑤（Yoyo）繼《季前賽》後再與姜濤飾演情侶嘅劇集，劇情引起話題之外，近日Yoyo就被指與豬仔錢罌撞樣，對於網民嘅討論，Yoyo大方於社交平台公開回應，更被激讚玩得。
日前，社交平台專頁「中女講呢啲」分享多張Yoyo嘅大頭照與豬仔錢罌作對比，寫道：「唔知點解…成日覺得葛綽瑤個樣好似豬仔錢罌」，引起網民熱議，唔少網民都話覺得好似：「唔講唔覺，一講真係好覺」、「邊個係豬仔錢罌？ 明明四個都係yoyo」、「你好厚道，特登揾張最可愛嘅豬仔錢罌圖片」、「可以稱呼佢為Yoyo豬」等等，又有網民詢問：「呢個到底係褒定貶？」，但近乎大比數都話覺得Yoyo好可愛：「依d（啲）係膠原蛋白，唔好羨慕！」、「咁可愛得唔得架」、「好順眼，有觀眾緣」等等。
Yoyo撞樣豬仔錢罌呢個話題更加上埋Google熱搜榜，無論輸入「yoyo」、「豬仔」關鍵字都會出現「豬仔錢罌yoyo」嘅關鍵字建議，出PO嘅「中女講呢啲」版主就指自己玩大咗。不過，Yoyo絲毫無介意，仲喺IG Story分享扮「豬鼻」嘅自拍照，表示：「最近聽說很多人話我似豬仔錢罌，就喺我今日化妝嘅時候，一路化胭脂，我就一路笑，好似真係有啲似，我覺得都係一個福氣嚟嘅」 ，其回應令網民大讚Yoyo高EQ，仲話即刻鍾意咗Yoyo；「中女講呢啲」版主就再出PO直言Yoyo相當玩得：「睇下葛綽瑤幾玩得吖！要求我道歉嗰位Miss Kong都要向佢學習，做人大方又玩得，自然受歡迎，仲要加埋青春可愛又靚女又有善心，無敵啦！ #Yoyo不紅天地不容#快啲上佢IGstory睇下有幾cute #豬仔錢罌yoyo」此外，亦有網民認為Yoyo撞樣多位女星，包括余思霆、區明妙、戴祖儀。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
