鄧兆尊吳家樂估小三「五索」爆大鑊內情 兆尊順手爆90年代女星同時暗交6位富商 意外懷孕冇人認頭

早前網紅「五索」（鍾睿心Rachel）被爆係已婚大生銀行主席馬清鏗「小三」，更傳出「五索」同馬清鏗有4個小朋友，引起全城嘩然。由吳家樂等主持嘅Youtube節目《娛樂好好玩》早前討論呢件事，仲搵到同上流家族有聯絡嘅鄧兆尊做嘉賓。

鄧兆尊直言同馬氏幾兄弟相識，認為佢地向來都係低調人，兆尊又提到同近期新聞爆出後，佢同馬清鏗其中一位姪仔用短訊溝通求證，對方只係答佢一句「哈哈」。兆尊認為可能馬家其他成員都知呢件事。

吳家樂同鄧兆尊分析事件時認為，「五索」同馬清鏗相交多年仲有埋小朋友的話，元配冇理由唔知。至於點解交往多年近期先爆出，吳家樂認為背後有事發生，可能係想成為「二房」有名份但雙方傾唔掂數。鄧兆尊就估計可能係生活費減少，有人於是爆料。

「五索」喺登上雜誌封面前搵過林作同裕美幫手，仲一齊拍片。吳家樂同鄧兆尊同時認為，「五索」最錯係搵林作幫手，甚至形容林係「好壞嘅軍師」。而節目出街後，林作喺社交平台發文指「本人將會就2025年1月20號吳家樂、鄧兆尊主持之 Youtube 節目於未來24小時作出重要澄清，就不實的報導及指控作出全面反駁之餘，提出正式要求。敬請期待」。

討論 「五索」事件之餘，鄧兆尊同時爆埋另一位90年代女星同時與4至6名富商交往，後來仲發現懷孕。兆尊指女星問佢應該同邊個富商「攤牌」，「我話呢啲冇得攤牌架，唔好以為你驗DNA……你同時期吖嘛？唔好諗住漁翁撒網，六個一齊收錢」。但係女星真係同各位富商男友交代，又真係俾佢成功咗。「六個一齊收錢，六個都唔認頭，（驗咗DNA都唔認頭？）直頭唔驗，當揞口費，一人一百萬，Bye Bye!（小朋友都唔要？）唔要，你自己養。」

話題引起網民熱議，就連吳家樂都估埋一份。而鄧兆尊就俾出多個貼士，分別係－

同吳家樂鄧兆尊同期；

90年代同吳家樂拍過戲；

唔係港姐；

拍古裝多；

身材好fit；

五大姓「陳李張黃何」其中之一。

有網民估係「行姐」陳彥行，鄧兆尊立即話「唔會啦！行姐咁蠢，點會做呢啲嘢？」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！